Aýyldarda aldaǵy bes jylda 655 medıtsınalyq nysan, 183 mektep salynady

ASTANA. QazAqparat – 2027 jylǵa qaraı aýyldyq jerlerde 655 densaýlyq saqtaý nysany, 183 mektep pen 100 sport ǵımaraty paıdalanýǵa beriledi, dep habarlaıdy QazAqparat tilshisi.

Ashyq NQA portalynda jarııalanǵan aýyldyq aýmaqtardy damytýdyń 5 jyldyq tujyrymdamasyn iske asyrý aıasynda kútiletin nátıjeler kórsetilgen. Atap aıtqanda, eldi mekenderdiń álemeýmettik-ekonomıkalyq ilgerileýin qamtamasyz etýge baǵyttalǵan sharalardyń nátıjesinde 3,5 myń aýyldyń ınfraqurylymy jańǵyrtylady.

«2027 jyldyń qorytyndysy boıynsha aýyldyq jerlerde 655 densaýlyq saqtaý nysany, 183 mektep jáne 100 sport ǵımaraty paıdalanýǵa beriledi. Osy aralyqta 650 mádenıet nysany salynyp, jóndeledi. Damý áleýeti bar 3,5 myń aýyldyq eldi mekenniń ınfraqurylymyn jańǵyrtý jumystary júredi. Eldi mekenderdegi ómir súrý uzaqtyǵyn 73,5 jasqa jetkizý kózdeledi. Bul kórsetkish 2021 jyly 70,8 jas bolǵan», - delingen tujyrymdama jobasynda.

Buǵan deıin habarlaǵanymyzdaı, tujyrymdamaǵa saı, Katonqaraǵaı, Úlken Naryn, Kúrshim, Marqakóldiń mártebesin qalpyna keltirý isi qolǵa alynady.

Sonymen birge shekara mańyndaǵy klımaty qatal aýyl turǵyndarynyń 1 jyldyq eńbek ótili 1,5 jyl bolyp eseptelmek.