Aýyldar men shaǵyn qalalardyń turǵyndary bıznes úshin jeńildikpen shaǵyn nesıe ala alady - QR AShM
Bul Memleket basshysynyń tapsyrmasy aıasynda aýyl halqynyń tabysyn arttyrý jónindegi jobany keńeıtýdiń arqasynda múmkin bolady. 2019 jyly ol Jambyl oblysynda pılottyq rejımde sátti iske asyryldy, dep habarlaıdy QazAqparat QR Aýyl sharýashylyǵy mınıstrliginiń baspasóz qyzmetine silteme jasap.
Baspasóz qyzmetiniń málimetterine qaraǵanda, búgin Aqtóbe oblysynyń turǵyndaryna jobanyń sharttary men erejeleri týraly aýyl sharýashylyǵy mınıstri Erbol Qarashókeev pen AMANAT partııasynyń tóraǵasy Erlan Qoshanov óńirge jumys sapary kezinde aıtyp berdi.
Osy joba boıynsha shaǵyn nesıe berý merzimi – 5 jyl, bul rette mal sharýashylyǵy salasyndaǵy bastamalar úshin 7 jyl kózdelgen. Maksımaldy soma – 2,5 myńnan 8 myńǵa deıin (zákirlik kooperatsııa) AEK, nomınaldy syıaqy mólsherlemesi jyldyq 2,5%-dan aspaıdy.
Qarajatty isin jańa bastaǵan jáne burynnan jumys istep júrgen kásipkerler; zeınet jasyna tolmaǵan qysqartylatyn jumyskerler; JK retinde tirkelmegen taýarlardy óndirý nemese satý, jumystardy oryndaý jáne qyzmet kórsetýdi derbes júzege asyratyn tulǵalar (onyń ishinde áreketsiz JK); otbasylyq kásipkerlikte aqy tólenbeıtin qyzmetti júzege asyratyn tulǵalar; jeke qosalqy sharýashylyqta kúnkóris deńgeıinen tómen tabys alyp, satý nemese aıyrbastaý úshin ónim óndiretin tulǵalar ala alady.
Jobany iske asyrýǵa 2023 jyly respýblıkalyq bıýdjetten 52,4 mlrd teńge (11 myńnan astam shaǵyn nesıe) kózdelgen. Bul rette ákimdikter qazirgi ýaqytta qosymsha qansha qarajat qajet ekenin anyqtaý úshin aýyldyq okrýgterge skrınıng júrgizip jatyr.
Foto: gov.kz