Aýyldaǵy jas kásipkerlerdiń 5 myń jobasyn memleket qarjylandyrady

NUR-SULTAN. QazAqparat – QR Ulttyq ekonomıka mınıstri Áset Erǵalıev shaǵyn jáne orta bızneske qoldaý kórsetý jumystaryn baıandady, dep habarlaıdy QazAqparat.

«Ekonomıkanyń zardap shekken sektorlaryndaǵy kásipkerlerdi qoldaý úshin shaǵyn jáne orta kásipkerlik kredıtterin qaıta qarjylandyrý júzege asyrylady. Ekonomıkalyq qyzmet túrleriniń tizbesi keńeıtilip, sýbsıdııalaý merzimi 3 aıǵa uzartyldy. Osy is-sharaǵa bıýdjetten 18,4 mıllıard teńge bólindi», - dedi Áset Erǵalıev Úkimettiń búgingi otyrysynda.

Mınıstrdiń aıtýynsha, bıylǵy shilde aıynda «Bıznestiń jol kartasy» jáne «Qarapaıym zattar ekonomıkasy» baǵdarlamalary aıasynda jańa bıznes jobalaryn sýbsıdııalaý úshin bıýdjetten qosymsha 13,2 mıllıard teńge bólindi. Eki baǵdarlamany qarjylandyrýdyń jalpy kólemi 186,3 mıllıard teńgeni quraǵan.

«Bıylǵy shildede «Jumyspen qamtýdyń jol kartasy» baǵdarlamasy aıasynda «Bastaý-Bıznes» jobasynyń túlekterine shaǵyn nesıe berý bastaldy. Oǵan 22,5 mıllıard teńge bólindi. Aýyldaǵy óz kásibin jańadan bastaıtyn kásipkerlerdiń 5 myńdaı jobasyn qarjylandyrý josparlanýda», - dedi Á. Erǵalıev.