Aýyldaǵy eńbek adamynyń mártebesine nazar aýdarý kerek - Jıgýlı Daırabaev
«Qazir aýyl sharýashylyǵynda problema barshylyq. Birinshiden, qarapaıym eńbek adamynyń mártebesine nazar aýdarý kerek, ıaǵnı jumysshylardyń jaǵdaıyn jasaý mańyzdy. Olardyń qatarynda memlekettiń azyq-túlik qaýipsizdigi máselesin sheship júrgen qarapaıym ınjenerler, mehanıkter, kombaınshylardyń, malshylardyń, qurylysshylardyń mártebesin qaıta qaraý qajet. Atap aıtqanda, osy salalalarda júrgen adamdar qoǵamda qurmetti ornyn alýy kerek», - dedi J. Daırabaev.
Onyń aıtýynsha, aýyl sharýashylyǵy salasynda qyzmet etip júrgen túrli formadaǵy 280 myń sharýashylyq bar. Solardyń barlyǵyn salyqtan bosatýdyń amalyn qarastyrý qajet.
«Óıtkeni qazir aýylǵa baryp jumys istep, aýyldy kórkeıtetin adamdar sırek kezdesedi. Atap aıtqanda, aýyl sharýashylyǵy salasynda júrgen azamattarǵa tıisti múmkindikterdi jasaý qajet. Munymen qosa, kvazımemlekettik sektordaǵy uıymdardy aýylǵa qaraı qaıtarý máselesin oılastyrmaqpyz. Sebebi aýyl sharýashylyǵyndaǵy óńdelmegen ónimdi ótkizetin oryndar, óńdeıtin arnaıy kásiporyndar uıymdastyrylmaǵan. Sondyqtan osy máselelerge erekshe basymdyq berý kerek», - dedi Jıgýlı Daırabaev.
Sonymen qatar ol aýyldardaǵy jol, sýmen qamtamasyz etý jáne basqa da ınfraqurylymyna qatysty sheshilmegen máseleler bar ekenin aıtty.
«Eldi mekenderge gaz, ǵalamtor tartyp, mádenı nysandar salý qajet. Jastardyń aýylǵa oralýyna tıisti múmkindik jasaý mańyzdy. Elimizdegi azyq-túlik qaýipsizdigi týraly tıisti zań qabyldaý kerek. Biz osy bastamany kóteretin bolamyz. Aýyl sharýashylyǵynda turaqtylyq bolmaı tur, mınıstrler jıi aýysady. Osyǵan deıin bul salada biraz kemshilikterge jol berildi, sondaı-aq baǵdarlamalar men josparlar tıisti deńgeıde oryndalmaı qaldy», - dedi J. Daırabaev.
Eske sala keteıik, «Qazaqstan» ulttyq arnasynyń tikeleı efırinde Májilis saılaýyna qatysatyn 7 saıası partııa ókilderiniń arasynda ótken pikirsaıys birer saǵat buryn aıaqtaldy. Oǵan «Amanat» partııasynan Elnur Beısenbaev, «Aýyl» halyqtyq demokratııalyq partııasynan Jıgýlı Daırabaev, Respublica partııasynan Syrymbek Taý, Qazaqstan Halyq partııasynan Ashat Asylbekov, «Baıtaq» jasyldar partııasynan Azamathan Ámirtaev, «Aq jol» demokratııalyq partııasynan Berik Dúısembınov, al Jalpyulttyq sotsıal-demokratııalyq partııasynan Nurlan Áýesbaev qatysty.