Aýyldaǵy densaýlyq saqtaýdy jańǵyrtý týraly ulttyq joba ázirlendi

ASTANA. QazAqparat – Aýyl turǵyndarynyń densaýlyq jaǵdaıyn jaqsartýǵa arnalǵan «Aýyldyq densaýlyq saqtaýdy jańǵyrtý» jobasy ázirlendi. Bul týraly QR Densaýlyq saqtaý mınıstri A. Ǵınııat aıtyp berdi, dep habarlaıdy QazAqparat tilshisi.

Mınıstrdiń aıtýynsha, joba úsh mindetti qamtıdy: birinshi - jetispeıtin medıtsınalyq-sanıtarııalyq alǵashqy kómek uıymdaryn salý arqyly barlyq aýyldy medıtsınalyq ınfraqurylymmen qamtamasyz etý. Ekinshi – zamanaýı medıtsınalyq jabdyqtary bar kópbeıindi aýdanaralyq ortalyq aýrýhanalar jelisin uıymdastyrý. Úshinshi – aýyldyq densaýlyq saqtaý obektilerin medıtsına kadrlarymen qamtý.

«Óńir ákimdikterimen birlesip 655 medıtsınalyq-sanıtarııalyq alǵashqy kómek obektisiniń, onyń ishinde 253 – medıtsınalyq pýnkttiń, 160 - dárigerlik ambýlatorııa men 242 – feldsherlik-akýsherlik pýnkttiń qurylysy boıynsha daıyndyq jumystary bastaldy. 32 kópbeıindi aýdandyq ortalyq aýrýhanamen qamtý – jumys istep turǵan 12 aýrýhanany jańǵyrtý jáne 20 jańa aýrýhanany salýdy kózdeıdi», - dedi A. Ǵınııat Úkimettiń búgingi otyrysynda.

Sonymen birge, ınsýlt jáne kardıologııalyq, reanımatsııa jáne qarqyndy terapııa, az ınvazıvti hırýrgııa, travmatologııa jáne ońaltý bólimshelerin ashý josparlanýda. Oǵan qosa, aýdandyq ortalyq aýrýhanany zamanaýı medıtsınalyq jabdyqtarmen, onyń ishinde KT, MRT, angıograf, saraptamalyq klastaǵy ýltradybystyq zertteý, endoskopııalyq, reanımatsııalyq, medıtsınalyq ońaltýǵa arnalǵan jabdyqtarmen jaraqtandyrý jáne kúrdeli jóndeý jumystaryn júrgizý kózdelgen.

«Ulttyq jobany qarjylandyrý bıylǵy 15 qarashada Respýblıkalyq bıýdjet komıssııasynyń otyrysynda maquldandy. Joba respýblıkalyq bıýdjetten 217,7 mlrd teńge kóleminde qarjylandyrýdy talap etedi», - dedi Densaýlyq saqtaý mınıstri.