Aýyldaǵy densaýlyq saqtaý salasyn jańǵyrtýdyń áleýmettik máni zor - Toqaev

ASTANA. QazAqparat – Memleket basshysy Qasym-Jomart Toqaev Reformalar jónindegi joǵary keńestiń kezekti otyrysynda aýyldaǵy densaýlyq saqtaý salasyn jańǵyrtýdyń mańyzdylyǵyna toqtaldy. Bul týraly QazAqparat Aqordaǵa silteme jasap habarlaıdy.

«Aýyldaǵy densaýlyq saqtaý salasyn jańǵyrtý» jobasynyń áleýmettik máni zor. Biz aýyl turǵyndarynyń 100 paıyzyn sapaly alǵashqy medıtsınalyq kómekpen qamtamasyz etý týraly aıtyp otyrmyz. Bul – memleket retinde bizdiń mindetimiz. Alaıda, bul – atqarylatyn barlyq jumystyń eń az bóligi.

Sondyqtan, jobanyń ekinshi komponenti – aýyr dertke shaldyqqandarǵa jáne jaraqat alǵandarǵa sapaly kómek kórsetý ýaqytyn qysqartýǵa múmkindik beretin kópbeıindi aýrýhanalardyń qurylysyna qatysty másele de mańyzdy», - dedi Memleket basshysy.

Prezıdent medıtsınalyq járdemniń jedeldigi men júrek-qan tamyrlarlary aýrýlaryna toqtaldy.

«Altyn saǵat» qaǵıdasyn beker ustanbaıdy – naýqasty jabdyqtalǵan aýrýhanaǵa neǵurlym tez jetkizse, onyń ómirin saqtap qalýǵa soǵyrlym múmkindik mol.

Bul bastama qanaınalym júıesiniń aýrýy saldarynan adam shyǵynyn azaıtýǵa aıryqsha tıimdi áser etedi dep úmittenemiz. Elimizdegi azamattardyń 35 paıyzy osy aýrýdan kóz jumady.

Qazaqstanda EYDU elderimen salystyrǵanda, ınsýlt pen ınfarkttan 2 ese kóp qaıtys bolady. Tipti, jastarymyz da qaıtys bolyp jatyr. Sońǵy úlgidegi tehnıkamen jabdyqtalǵan kópbeıindi aýrýhanalar jelisi – ult saýlyǵyna qosylǵan zor úles ári tıimdi sheshim», - dedi Prezıdent.