Aýyldaǵy bilim sapasy: 5000 mektepke jańǵyrtý jumystary júrgiziledi

NUR-SULTAN. QazAqparat – Úkimet basshysy Asqar Mamın mektepterdegi jóndeý jumystaryna qatysty senatordyń saýalyna jaýap berdi, dep habarlaıdy QazAqparat tilshisi.

«Aýylda bilim berý sapasyn jaqsartý úshin 2025 jylǵa qaraı 5000 mektepke jańǵyrtý júrgizý josparlanýda, bul aýyl mektepteriniń 95%-y. 2021 jyly 5000 mekteptiń 1015-i, 2022 jyly - 1003 mektep, 2023 jyly - 994 mektep, 2024 jyly - 994 mektep, 2025 jyly - 994 mektep jańǵyrtylatyn bolady», - delingen Úkimet basshysynyń saýalǵa bergen jaýabynda .

Onyń aıtýynsha, barlyǵy 5000 mektepti jańǵyrtýǵa jergilikti bıýdjetten 51,4 mlrd teńgeden astam qarajat josparlanǵan. Aýyl mektepterin jańǵyrtý kúrdeli jáne aǵymdaǵy jóndeý júrgizýdi, mektepterdi pándik kabınettermen, mektep jıhazymen jaraqtandyrýdy, mektep kitaphanalary men ashanalaryn jańǵyrtýdy, joǵary jyldamdyqty ınternetpen qamtamasyz etýdi qamtıdy.

«Bilim jáne ǵylym mınıstrligi oblystardyń, Nur-Sultan, Almaty jáne Shymkent qalalarynyń ákimdikterimen birlesip, mektep qurylysynyń jańa modelin birlesip qarjylandyrýdy eskere otyryp, aldaǵy 5 jylǵa arnalǵan mektep qurylysyna qajettilikke egjeı-tegjeıli taldaý júrgizdi, sondaı-aq 2021-2025 jyldarǵa arnalǵan 800 mektep qurylysynyń jospar-kestesin ázirledi», - dedi A. Mamın.

Aıta keteıik, bıyl qazan aıynda senator Aqylbek Kúrishbaev óziniń depýtattyq saýalynda aýyl jastarynyń joǵary bilimge qol jetkizý problemasyn aıtty.