Aýylda turǵan ákim halyqtyń jaǵdaıymen tikeleı tanys bolady – Málik Myrzalın

NUR-SULTAN. QazAqparat – Aýyldy basqaratyn ákimder qala nemese aýdan ortalyqtarynda turmaýy kerek. Osyndaı oıdy QR Prezıdenti Ákimshiliginiń basshysynyń orynbasary Málik Myrzalın alǵa tartty, dep habarlaıdy QazAqparat.

«Zańnamada eshqandaı tártip qarastyrylmaǵan. Saılaý komıssııasy qorytyndy shyǵarady, kandıdatty tirkeıdi, sodan soń saılanǵan ákim birden qyzmetine kirisedi. Demek búgin-erteń bolatyn is. Aýyl ákimderi de memlekettik qyzmetshi, sondyqtan olarǵa da talap ortaq. Bul saılaýda aýyl ákimin jergilikti halyqtyń ózi tańdaǵandyqtan, ol eldiń muń-muqtajymen tanys, ári halyqqa jaqyn bolady. Halyqta ózi saılaǵan adamdy jaqsy tanyǵandyqtan máselelerin ákimge tikeleı jetkize alady, bul degenimiz ekijaqty ıaǵnı keri baılanys bar degen sóz», - dedi M. Myrzalın «Habar24» telearnasyna suhbat berý barysynda.

Onyń aıtýynsha, el basqarýda halyqpen ózara qarym-qatynastyń mańyzy erekshe.

Sondaı-aq, M. Myrzalın saılanǵan ákim sol aýylda turýy tıis degen oıdy alǵa tartty. Málimdeýinshe, aýylda turǵan ákim jergilikti máselelerdi óz kózimen kórip, halyqtyń jaǵdaıymen tikeleı tanys bolady.

«Buǵan deıin saılaýsyz taǵaıyndalǵan ákimder qalada nemese aýdan ortalyqtarynda turyp, aýyldy basqarǵanyna senimdimin. Endi aýyl halqy ózderi saılaǵan ákimniń olaı isteýine jol bermeıdi», - deıdi ol.