Aýylda telefon boıynsha tarıf qymbattamaıdy – Qarjy mınıstri
Aıta ketsek Parlament Májilisiniń jalpy otyrysynda Ulttyq ekonomıka mınıstri Rýslan Dálenov Qazaqstandaǵy bıznes-ahýaldy jaqsartý máseleleri boıynsha jańa zań jobasyn tanystyrǵan bolatyn.
Zań jobasyna qatysty depýtat Aızada Qurmanova óz oıyn ortaǵa saldy.
«Zań jobasynda aýyldy eldimekender boıynsha ámbebap qyzmetterdi sýbsıdııalaýdy alyp tastaý usynylǵan. Bul degenimiz – kádimgi úı telefondary. Bul norma aýyl turǵyndaryn birden-bir baılanys quralynan ajyratqaly otyr. Sol sebepti Májilis depýtattary ámbebap qyzmetterdi sýbsıdııalaýdy saqtaǵan durys dep oılaımyz. Buǵan qatysty ne aıtar edińiz», - degen májilismen bul norma jónnide Tsıfrlyq damý, ınnovatsııalar jáne aeroǵarysh ónerkásibi mınıstri Asqar Jumaǵalıevtyń oıyn surady.
Asqar Jumaǵalıev depýtattardyń bul eskertpesine durys qaraıtynyn jetkizdi. Onyń aıtýynsha 2004 jyly qolǵa alynǵan jumystardyń arqasynda Qazaqstandaǵy aýyldardyń kóbi telefon baılanysymen qamtamasyz etilgen.
«Biz dál osy sýbsıdııa júıesimen aldaǵy ýaqytta aýyldarǵa ınternet tartýdy kózdeımiz. Sol sebepti osy sýbsıdııanyń saqtalǵany durys. Aýyldaǵy halyqqa telefon da, ınternet te qoljetimdi bolýy kerek», - dedi ol.
Atalmysh máselege qatysty Májilis Tóraǵasy Nurlan Nyǵmatýlın depýtattardyń bul usynysyn qoldaıtynyn jetkizdi.
«Shynyn aıtý kerek, qazir aýylda ǵana emes, qalalardyń ózinde ınternet baılanysy nashar. Ony jaqynda bárimiz de kórdik. Sondyqtan jasyratyny joq búgin kóptegen aýylda bir ǵana sapaly baılanys – ol telefon. Qazirgi ýaqytta oǵan aıyna 670 teńge tólenedi. Eger bul tarıf 2-3 ese óser bolsa halyq ony qalaı tóleıdi. Nege ony oılamaısyzdar?» - dedi Májilis Tóraǵasy.
Nurlan Nyǵmatýlın «Qazaqtelekom» kompanııasymen zańnyń bul normasyna qatysty anyqtama alynǵanyn jetkizdi. Kompanııa bul norma kúshine enip ketse, 630 myń abonent boıynsha telefon tarıfi ósetinin habarlaǵan.
«Bul aýyldaǵy abonentterdiń – 98 paıyzy. Álbette mundaı jaǵdaıda monopolıst tarıfti kóteredi. Artynsha tutynýshy telefon úshin burynǵydan kóbirek aqsha tóleýge májbúr bolady. ıAǵnı, 670 teńgelik tarıf 2-3 ese ósip ketedi degen sóz. Bul norma aýyldaǵy turǵyndardy jalǵyz baılanys quralynan aıyrady. Sebebi olarda kommýnıkatsııanyń balamaly túri joq», - dep tolyqtyrdy N.Nyǵmatýlın.
Bul máselege qatysty Úkimet basshysynyń orynbasary – Qarjy mınıstri Álıhan Smaıylov aýyldaǵy telefon baılanysy úshin tólem qymbattamaıynyn, sebebi respýblıkalyq bıýdjettiń esebinen bul baǵytta aldaǵy úsh jylda 8,5 mlrd teńge qarastyrylǵanyn jetkizdi.
«Aýyldar úshin telefon qyzmeti tarıfiniń qymbattaýyna jol berilmeıdi. Sýbsıdııalaý shemasy burynǵysha qala beredi. Jeke memlekettik organdar zań jobasyn maquldaý kezinde aýyldyq eldimekender boıynsha baılanys naryǵyndaǵy básekelestikti damytý úshin usynystaryn bergen. Sol kezde bul norma zań jobasyna «baıqaýsyzda» kirip ketken sekildi. Daý týdyratyn norma ekenin sezip, zań jobasynan alyp tastaý kerektigin usynamyz», - dedi ol.