Aýylda pedagog mamandardyń sanyn arttyrý mańyzdy – Jandos Bazartaı

QYZYLORDA. QazAqparat – «Memleket basshysy Qasym-Jomart Toqaev Qazaqstan halqyna Joldaýynda bilim salasyn damytýǵa aıryqsha nazar aýdardy. Qaı elde de bul salaǵa árdaıym qamqorlyq jasalady. Bilim – erteńge salynǵan ınvestıtsııa ekeni belgili». Qorqyt ata atyndaǵy Qyzylorda memlekettik ýnıversıtetiniń prorektory Jandos Bazartaı osylaı pikir bildirdi.

«Bizdiń elimiz táýelsizdik jyldarynda oqý-aǵartý isine erekshe qamqorlyq jasap keledi. Elimizdiń árbir óńirinde záýlim mektepter boı túzep, onda oqýshylar sapaly bilim alýǵa qol jetkizip keledi. Bul salaǵa qajetti zamanaýı tehnologııa qazir bizdiń árbir mektebimizde jas urpaqqa qyzmet kórsetedi. Bul jas órenderdiń jan-jaqty damýyna oń áser tıgizetini belgili. Osyndaı qamqorlyq aldaǵy ýaqytta da jalǵasyn tabatyny qýantady. Memleket basshysy óz Joldaýynda osy baǵytta atqarylatyn jumystar barysyn aıtyp ótti. Birqatar problemalarǵa jan-jaqty toqtaldy. Máselen, jyl saıyn 21 myńnan astam túlek kásibı jáne joǵary oqý oryndaryna túse almaı qalady eken. Bul kórsetkish kópshilikti oılantady. Jastar - egemendi elimizdiń keleshegi. Olardyń bolashaǵyna beıjaı qaraýǵa negiz joq. Sebebi, olardyń arasynda jumyssyz jastardyń artýy qoǵamnyń kúrdeli máselesine aınalady. Sondyqtan bul túıtkildiń túıinin tarqatýǵa mán bergenimiz jón. Osy oraıda Prezıdent «Biz oqýshylardyń qabiletin aıqyndap, kásibı baǵyt-baǵdar berý saıasatyna kóshýimiz qajet. Bul saıasat orta bilim berýdiń ulttyq standartynyń negizi bolýy tıis» dep atap kórsetti», - dedi Jandos Bazartaı.

Onyń aıtýynsha, qala jáne aýyl mektepteri arasyndaǵy bilimniń sapasy alshaqtap bara jatqanyna baılanysty tıisti is-sharalardy qolǵa alýy qajet. Joldaýda Prezıdent aıtyp ótkenindeı, aýyldyq jerlerde bilikti pedagog kadrlardyń tapshylyǵy anyq baıqalady.

«Prezıdent osy baǵytta tıisti jumystardyń qolǵa alatynyn aıtty. Solardyń biri retinde «Dıplommen aýylǵa» baǵdarlamasynyń aıasyn keńeıtip, jumysty jańa deńgeıde jalǵastyrý qajettigine toqtaldy. Bizdiń elimizde halyqtyń teń jarymynan astamy aýyldarda turatyny belgili. Sondyqtan jergilikti jerlerde pedagog mamandardyń qataryn arttyrýǵa nazar aýdarǵanymyz oryndy. Bizdiń Qorqyt ata atyndaǵy Qyzylorda memlekettik ýnıversıteti bul baǵytta tıisti is-sharalardy qolǵa alyp keledi. Nátıjesinde bizdiń joǵary oqý ornyn bitirgen túlekterde týǵan topyraqqa oralyp, mektepterde pedagog mamandardyń qataryn tolyqtyryp otyr. Degenmen elimizde túlekterdiń jartysyna jýyǵy óz dıplomy boıynsha qyzmetke ornalasa almaı júrgen joǵary oqý oryndary kezdesedi. Sondyqtan bul baǵytta tıisti is-sharalardy óz deńgeıinde júzege asyrýǵa mán berýimiz tıis», - dedi Jandos Bazartaı.

Esterińizge sala ketelik, keshe Memleket basshysy Qasym-Jomart Toqaev Qazaqstan halqyna Joldaýyn jarııa etti.