Aýylda oqyǵan 1000 oqýshy elimizdegi úzdik mektepterde bilimin jetildiredi
«Elbasy Akademııasy» korporatıvti qory taratqan málimetterge qaraǵanda, 21 tamyzda aýyl mektepterine arnalǵan birinshi ulttyq olımpıadanyń qorytyndy kezeńi ótti.
Jarys barysynda olımpıadanyń 5 myń qatysýshysy –Qazaqstannyń óńirlerindegi aýyldarda bilim alǵan oqýshylar fýnktsıonaldyq saýattylyq pen abstraktili-logıkalyq oılaý daǵdylaryn synaı aldy.
Olımpıada qatań karantındik normalardy saqtaı otyryp, 19 Nazarbaev Zııatkerlik mektepteri men ár aýdan ortalyqtaryndaǵy 34 pýnkt negizinde uıymdastyryldy.
Olımpıada qorytyndysy boıynsha, 5 jáne 6 synyptaryn bitirgen 1000 jeńimpaz oqýshy óz bilimderin «Bilim-ınnovatsııa lıtseıi», Respýblıkalyq fızıka-matematıka mektebi jáne «Daryn» sııaqty daryndy balalarǵa arnalǵan jetekshi mektepterde ári qaraı jalǵastyra alady.
«Myń bala» - aýyl balalaryn qoldaý men damytýǵa arnalǵan, aýyl balalarynyń qala oqýshylarymen birdeı básekelesýine jaǵdaı jasaýǵa, bilimdegi alshaqtyqty qysqartýǵa baǵyttalǵan ulttyq aýqymdaǵy biregeı joba. Joba Nursultan Nazarbaev Qory men «Elbasy Akademııasy» korporatıvti qorynyń «El Úmiti» talantty jastardy anyqtaý jáne qoldaý jónindegi bastamasy sheńberi aıasynda iske asyrylýda.
Olımpıada 2020 jyldyń 24 aqpanynda bastaldy. Oǵan 295 myń oqýshy qatysty. Ekinshi kezeńge 5 myń oqýshy ótti. Birinshi kezeń syrttaı ótip, matematıka, jaratylystaný, ınformatıka, qazaq, orys jáne aǵylshyn tilderi pánderi boıynsha úlgerimdi baǵalady.
«Eger birinshi kezeńde úmitkerlerdiń akademııalyq qabiletteri baǵalansa, ekinshi kezeńde - tanymdyq qabiletteri synǵa tústi. Biz qabyldaý kezinde oqýshylardyń ómir súrýine jaǵdaı jasaı alatyn mektepterdi tańdadyq. Sonymen qatar, barlyq 5 myń qatysýshy «Elbasy Akademııasy» janyndaǵy onlaın-mektepke aqysyz tirkeledi», - dep atap ótti «Elbasy Akademııasy» korporatıvtik qorynyń dıagnostıka jáne damý jobalarynyń úılestirýshisi Jazıra Asanova.
Onyń sózinshe, olımpıadanyń birinshi kezeńinen ótken qatysýshylar úshin qashyqtyqtan oqytý portaly qoljetimdi bolady. Sonymen qatar, oqýshylardy únemi onlaın-qoldaý uıymdastyrylǵan, jáne onyń ishinde pán muǵalimderiniń sabaqtary men keńesteri qarastyrylǵan. Onlaın mektep jumysyn osy kúzde bastaıdy.
«Meniń qyzym «Rodına» aýylynyń mektebinde oqıdy. Olımpıadanyń birinshi kezeńinen ótken kezde biz óte qatty qýandyq. Qyzym óte qabiletti, aǵylshyn tilin jaqsy biledi, matematıkany jaqsy kóredi. Bári jaqsy bolady dep úmittenemin jáne ol óz maqsatyna jetedi dep oılaımyn», - dep Aqmola oblysynyń turǵyny Tımýr Omarov jýrnalısterge suhbat berdi.
Olımpıadada jeńimpaz atanǵan 1000 oqýshysynyń tizimi www.fnn.kz saıtynda ekinshi kezeńnen ótken soń, 14 kúnde jarııalanady. Dál osy saıtta olımpıada jeńimpazdary daryndy balalarǵa arnalǵan mamandandyrylǵan mektepterdiń birine ótinish bere alady.