Aýylda ınternet eki ese jyldam ári arzan bolady - Abaev

ASTANA. QazAqparat - QR Aqparat jáne kommýnıkatsııalar mınıstri Dáýren Abaevtyń aıtýynsha, "Aýylǵa arnalǵan keń jolaqty ınternet" jobasy iske asatyn bolsa, 4 mıllıon adam jyldam ári sapaly ınternetpen qamtamasyz etiledi, dep habarlaıdy QazAqparat tilshisi.

"Búginde aqparattyq texnologııalardy paıdalaný jaǵynan qala men aýyldyń arasynda úlken alshaqtyq bar. Qalada ınternet jyldam isteıdi. Sonyń arqasynda elektrondy portal arqyly memlekettik qyzmetterdi ońaı alýǵa bolady. Aýylda olaı emes. Sondyqtan biz qala men aýyldyń osy bir alshaqtyǵyn azaıtý maqsatynda arnaıy jobany usynyp otyrmyz. Atalǵan bastama júzege assa, úsh jyldyń ishinde 1 900 eldi mekende jyldam ári sapaly ınternet bolady. Osylaısha, 4 mıllıon adam keń jolaqty ınternetti qoldana bastaıdy. Bul degenimiz, aýylda otyrǵan aǵaıyn úıden shyqpaı-aq kez kelgen qujatqa tapsyrys berip, sony poshtamen aldyrta alady", - dedi Abaev búgin Úkimet otyrysynan keıin ótken baspasóz máslıxatynda.

Mınıstrdiń sózine qaraǵanda, aýylǵa arnalǵan ınternettiń baǵasy da arzan bolady. Sebebi jergilikti jerde arnaıy tarıfter engizý kózdelip otyr.

Aıta keteıik, baspasóz máslıxaty barysynda mınıstr jyldyń aıaǵyna deıin árbir azamatty mártebesine qaraı taǵy bir ret tirkeýge turýǵa úndedi. Sebebi kelesi jyldan bastap mindetti áleýmettik medıtsınalyq saqtandyrýdyń jarnalary adamnyń jumyssyz, ıa bolmasa, jumysy bar degen mártebesine qaraı tólenedi. Ol úshin xalyqqa qyzmet kórsetý ortalyǵyna baryp, tirkeýge turý qajet .