Aýylda daýys beretin halyq kóp - Tóleýtaı Rahymbekov

NUR-SULTAN. QazAqparat - QR Prezıdenttikke kandıdat Tóleýtaı Rahymbekov aýyl halqynyń daýys berýine qatysty pikir bildirdi, dep habarlaıdy QazAqparat tilshisi.

«Men ózim azamattyq quqyǵymdy alǵannan keıin bir nárseni baıqadym. 1982 jyly stýdent bolyp júrgende birinshi ret daýys berdik qoı. Sodan beri baıqaǵanym, aýyl turǵyndary saılaýǵa óte belsendi qatysady. Qaıta qalalar, sonyń ishinde iri qalalar ondaı belsendilik kórsetpeıdi. Aýyldaǵy halyq bir-birin jaqsy biledi ǵoı. Saılaý ýchaskesinde kezdesip, suhbattasýǵa jınalady. Sosyn bir-birinen uıalady. Nege barmaı qaldyń? Nege daýys bermediń? Sondaı suraqtar bolady. Aýylda ondaı bar ǵoı» - dedi T.Rahymbekov QazAqparat tilshisine bergen suhbatynda.

Onyń aıtýynsha, búginde halyqtyń 43 protsentten astamy aýylda turady. Al qalanyń ózinde aýyldan shyqqan azamattar kóp. «Sondyqtan bizdiń senimimiz mol. 50 protsent + 1 daýys jınaımyz degen úmitimiz bar. Endi, naqty bir karsylasym bar dep aıta almaımyn. Degenmen, árbir kandıdatqa qurmetpen qaraýymyz qajet. Barlyǵy birdeı», - dep atap kórsetti T.Rahymbekov.

Aıta keteıik, búgin QR Ortalyq saılaý komıssııasy Tóleýtaı Rahymbekovke QR Prezıdenttigine kandıdat kýáligin tapsyrdy. Hattamalarǵa sáıkes, Qazaqstannyń barlyq óńirlerinen 122 309 azamattyń qoly jınaldy. Sonyń 120 754-ti rastaldy. Al kandıdat jınaǵan qoldardyń qajetti sany keminde 118 140 bolýy kerek. Osylaısha, Tóleýtaı Rahymbekov 2019 jylǵy 9 maýsymǵa taǵaıyndalǵan QR Prezıdentiniń kezekten tys saılaýyna kandıdat retinde resmı túrde tirkeldi.