Aýylda bızneske bet burǵan áıelder sany artty

ASTANA. QazAqparat - Elordada QR Memlekettik hatshysy Gúlshara Ábdiqalyqovanyń tóraǵalyǵymen QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń otyrysy ótti, dep habarlaıdy QazAqparat tilshisi.

Talqylaýlar barysynda nátıjeli jumyspen qamtýdy damytý baǵdarlamasy aıasynda kásipker áıelderdi qarjylyq jáne basqa da tetiktermen qoldaý baǵyttary qaraldy.

«Baǵdarlama arqyly aýyldyq jerlerde kásipkerlerdi qarjylandyrýdamyz. Ótken jyly bul baǵdarlamanyń bıýdjeti 27 mlrd teńgege tarta qarjyny qurady. Osy oraıda 6,7 myń nesıe berilip, onyń ishinde 2,3 myńyn kásipker áıelder aldy. Biz eki baǵyt boıynsha qarjylandyramyz, ıaǵnı aýyl sharýashylyǵyna qatysty jáne aýyl sharýashylyǵyna qatysty emes bıznes bolyp bólinedi. Atap aıtqanda, bıznestiń aýyl sharýashylyǵy emes túri boıynsha nesıelerdi negizinen áıelder alady. Olar aýyldaǵy ınfraqurylymdy damytyp jatqandyǵy qýantady. Bul rette shashtaraz, tigin salondary, naýbaıhanalar ashylýda», - dedi Aýyl sharýashylyǵy vıtse-mınıstri Rústem Qurmanov tilshilerge bergen suhbatynda.
 

Sonymen qatar ol bıyl shaǵyn nesıeleý sharalaryna 30 mlrd teńgege tarta qarjy bólingenin eske salyp ótti.

«Memleket basshysynyń qoldaýy arqyly respýblıkalyq bıýdjetten qosymsha 13,9 mlrd teńge bólinip, bizde shaǵyn nesıeleýge eskerilgen jalpy bıýdjet 44,7 mlrd teńgeni qurady. Bul turǵyda 11 myń kásipkerdi nesıelendirý maqsatyn qoıyp otyrmyz jáne osy salada jaqsy qarqyn oryn alǵanyn baıqadyq. Biz 498 nesıeni berdik, onyń ishinde 174-in áıelder aldy. Byltyr áıelder kásipkerliginiń ortasha úlesi 35 paıyz bolsa, qazirgi kezde 43 paıyzǵa jetti. Osy arqyly áıelder belsendigi erlerge qaraǵanda artyqtaý ekenin atap ótýge bolady», - dep túıdi R. Qurmanov.