Aýyl turǵyny malynyń brýtsellezge shaldyqpaǵanyn dáleldeı almaı júr

JARKENT. QazAqparat - Almaty oblysyndaǵy Panfılov aýdanyna qarasty Altyúı aýylynyń turǵyny Farıda Masımova qorasyndaǵy bes qoıynyń brýtsellezge shaldyqpaǵanyn dáleldeı almaı júr. Turǵyn aýdandyq sotqa shaǵymdanǵan, alaıda jeńilip qalǵan. Oblystyq sotta da apellıatsııalyq shaǵymdy qanaǵattandyrmady, dep habarlaıdy QazAqparat tilshisi.

Farıda Masımovanyń sózinshe, Panfılov aýdanynda ótken sot aýdandyq veterınarııa bólimi men turǵyn arasynda bola tura, protseske prokýror qatyspaǵan.

«Bizde ekinshi tarap memleket bolǵandyqtan, mindetti túrde prokýror qatysýy kerek edi. Alaıda prokýror qatysqan joq. Jáne prokýrordyń qatysýynsyz isti qaraý jóninde sot taraptardyń pikirin de suraǵan joq», - dedi apellıatsııalyq shaǵym túsirýshi taraptyń senimdi ókili Ásel Omarbekova oblystyq sot alqasyna.  

Bes qoıynyń saý ekenin qaıtsem de dáleldeımin degen turǵyn Aýyl sharýashylyǵy mınıstrligine de hat joldaǵan. Ol jerde saýlyqtardan brýtsellez anyqtalǵan jaǵdaıda ekinshi márte qan synamasyn alýǵa bola ma, eger bolmasa ol qaı zańda kórsetilgenin kórsetýdi jazǵan. Mınıstrlik jaýabynda bylaı delingen:

«Qazaqstan Respýblıkasynyń «Veterınarııa týraly» Zańynyń 35-bap 2 tarmaǵynyń 6-1 tarmaqshasynda kórsetilgendeı, aýyl sharýashylyq janýarlarynyń qan synamalaryn qaıta tekserý mal ıesiniń esebinen júrgiziledi».

Alaıda, Farıda Masımova óz esebinen eshqandaı da ekinshi synama júrgizilmegenin aıtady.

Panfılov aýdandyq veterınarııa bóliminiń bas mamany Qanapııa Raqyshevtiń sózinshe,  brýtsellez aýrýy rastalǵan maldan eshqashan ekinshi márte qan alynbaıdy.

«Brýtsellezge oń nátıje bergen aýylsharýashylyq janýarynan ekinshi ret qan alyp, teksermeıdi. Aýyl sharýashylyq mınıstrliginiń mal ıesi esebinen júrgiziledi dep otyrǵany - zerthanada saqtaýly turǵan, brýtsellezge oń nátıje bergen synamany ekinshi referenttik ortalyqta tekserý. Bul bes qoıdyń synamasy Almaty Ulttyq referenttik ortalyǵynda tekserilgen jáne qaıtadan oń nátıje bergen», - dedi Panfılov aýdandyq veterınarııa bóliminiń bas mamany Qanapııa Raqyshev.

Farıda Masımova dál sol ortalyqqa óz qoılarynyń synamasy barǵanyna kúdikpen qaraıdy. Qazir veterınarııa bólimi brýtsellez degen bes qoıy da qozylap, ósip-ónip jatqanyn aıtqan turǵyn endi Joǵarǵy sotqa shaǵymdanbaq.  

Turǵyn bes qoıynyń saý ekenin dáleldeý úshin shash-etekten shyǵynǵa battym dep otyr. Tek ádildik kerek degen F.Masımova advokat jaldap, Jarkent pen Taldyqorǵan arasynda júr. Endi ol Astanaǵa jol tartpaq.