Aýyl turǵyndarynyń janaıǵaıy sheneýnikterdiń qulaǵyna jetti - Aqmola oblysy
Aýdan ákimdiginiń málimeti boıynsha, Baımyrza aýyldyq okrýgine qarasty Shoshqaly aýylyna osy kúnge deıin «Stepnıak sý» kommýnaldyq sharýashylyǵy sý jetkizip keldi. Aýyl turǵyndary paıdalanylǵan sýǵa aqy tólemeı qoıǵannan keıin tirshilik nárin tasymaldaý toqtatyldy.
«Kókshetaýgıdrogeologııa» kásiporny «Óńirlik, geologotúsirilim, izdeý-baǵalaý jáne izdeý-barlaý jumystary» baǵdarlamasy boıynsha 2014-2015 jyldar aralyǵynda Shoshqaly jáne Úlgi aýyldaryn jerasty sý qorlary esebinen qamtamasyz etý maqsatynda izdeý-barlaý jumystaryn júrgizdi. Ortalyqqazaqstandyq óńiraralyq komıssııanyń paıdaly qazbalar qory boıynsha ótken otyrysynda barlaý jumystary júrgizilgen barlyq aýmaqtarda atalmysh eldi mekenderdi aýyz sýmen qamtamasyz etýge sý qory jetkilikti ekeni týraly qaýly shyǵardy.
Osyǵan oraı, jobalaý-smetalyq qujattardy ázirleý úshin oblystyq bıýdjettik komıssııaǵa aqsha bólý týraly arnaıy hat joldandy. Bul suraqtardy Eńbekshilder aýdandyq qurylys, sáýlet jáne qalaqurylysy bólimi baqylaýǵa aldy.
Al nanmen qatamasyz etý máselesine keletin bolsaq, as atasyn aýyldyqtarǵa «Sháripov» JK jetkizip berýde. Baımyrza selolyq okrýginiń ákimi Rýslan Izmaılovqa aýyl turǵyndaryn nan jáne nan ónimderimen turaqty túrde qamtamasyz etý máselesin baqylaýǵa alý týraly tapsyrma berilgen bolatyn.
Baımyrza selolyq okrýginiń joldaryna kúrdeli jóndeý jumystaryn júrgizý úshin jergilikti bıýdjetten qarjy bólingen joq. Degenmen, aýdandyq maqsattaǵy joldardy ustap turý úshin jyl saıyn aqsha bólinip, oǵan aǵymdaǵy jóndeý, ıaǵnı, shuńqyrlardy durystaý, shópterin shabý jáne qardan tazartý sııaqty jumystar atqarylady. Oǵan qosa, Baımyrza aýylyndaǵy Birjan sal kóshesi jóndeldi.