Aýyl turǵyndaryn dári-dármekpen qamtý qalaı júrgizilýde

NUR-SULTAN. QazAqparat – Aýyldyq aýrýhanalar úshin 9,5 mlrd teńgege dárilik zattar jáne medıtsınalyq buıymdar satyp alyndy. Bul jaıynda Senat depýattarynyń resmı saýalyna oraı QR Premer-Mınıstri Asqar Mamınniń bergen jaýabynda aıtylǵan, dep habarlaıdy QazAqparat tilshisi.

Úkimet basshysynyń atap ótýinshe, «Halyq densaýlyǵy jáne densaýlyq saqtaý júıesi týraly» Kodekstiń 233-baby 6-tarmaǵyna sáıkes aýdan ortalyǵynan shalǵaıdaǵy, dárihanalar joq eldi mekenderde dárilik zattar men medıtsınalyq buıymdardy ótkizý medıtsınalyq-sanıtarlyq alǵashqy kómek kórsetetin densaýlyq saqtaý uıymdaryndaǵy jáne jyljymaly dárihana pýnktteri arqyly júzege asyrylady.

«Óńirler málimdegen qajettilikke sáıkes ambýlatorlyq dári-dármekpen qamtamasyz etý úshin «SK-Farmatsııa» JShS 542 dárilik zattar jáne medıtsınalyq buıymdar ataýyn 116,6 mlrd teńgege, onyń ishinde aýyl turǵyndary úshin – 30,7 mlrd teńge, statsıonarlyq deńgeı úshin – dárilik zattar jáne medıtsınalyq buıymdardyń 1 018 ataýyn 110,6 mlrd teńge somasyna, onyń ishinde aýyldyq aýrýhanalar úshin 9,5 mlrd teńge somasyna satyp aldy», - dedi Asqar Mamın.

Premer-Mınıstrdiń aıtýynsha, aýyldyq eldi mekenderdi dárilik zattarmen, medıtsınalyq buıymdarmen qamtamasyz etý monıtorıngi, densaýlyq saqtaý uıymdaryn materıaldyq-tehnıkalyq jaraqtandyrý Qazaqstan Respýblıkasynyń aýmaǵynda koronavırýstyq ınfektsııanyń taralýyna jol bermeý jónindegi vedomstvoaralyq komıssııa deńgeıinde júrgiziledi.