Aýyl turǵyndary medıtsınalyq kómek ala almaı júr - Qýanysh Seıitjanov
«Bir aıdyń ishinde «Aýyl» partııasynyń óńirlerdegi volonterleri, belsendileri aýyldyq jerdegi medıtsınalyq qyzmettiń sapasyna erikti túrde montorıng júrgizgen edi. Sonyń nátıjesinde 200-ge jýyq aýyldyń qazirgi epıdemıologııalyq jaǵdaıda medıtsınalyq qyzmet kórsetý barysymen tolyq tanystyq. Árıne, aýyldardaǵy medıtsınalyq qyzmet kórsetýdiń qazirgi jaǵdaıy asa máz emes, múshkil dep aıtsaq ta bolady. Óıtkeni, ózderińiz bilesizder, 90-shy jyldardaǵy ońtaılandyrý tusynda kóptegen aýyldaǵy emhanalar, ambýlatorııalar, feldsherlik pýnkter jabylyp qalǵan edi. Feldsherlik pýnkter, aýrýhanalar jabylǵanymen naýqastar sany óspese, kemigen emes», - deıdi ol.
Onyń aıtýynsha, koronavırýs indeti tarap, epıdemıologııalyq jaǵdaıdyń ýshyǵyp turǵan tusynda aýyl turǵyndarynyń dárigerlerdiń qyzmetine júginý máselesi úlken problemaǵa aınalyp otyr. Mundaı jaıt barlyq óńirge tán desek te bolady.
«Bul júıeli problemaǵa aınalyp otyr. Bizdiń partııalyq bastamamyzdyń negizgi maqsaty da - osy problemalardy joıýǵa sep bolý. Qazir medıtsına salasyna bólinetin memlekettiń bıýdjeti jetkilikti. Odan bólek, Medıtsınalyq áleýmettik saqtandyrý qorynda da qanshama qarjy bar. Sonyń esebinen feldsherlik pýnktiler, aýrýhanalar, ambýlatorııalar jabylyp qalǵan aýyldarda olardy qaıta ashqyzýǵa qozǵaý salmaqpyz. Biz bul máseleni qandaı deńgeıde bolmasyn kóterip, jalpy aýyldardaǵy medıtsınalyq qyzmet sapasyn qalpyna keltirý ne bolmasa jaqsartý úshin qyzmet ete beremiz», - deıdi partııa ókili.
Partııanyń apparat jetekshisi málimetinshe, monıtorıng barysynda Jambyl, Qaraǵandy oblystarynda, jalpy basqa da óńirlerde de 3-4 aýylǵa bir feldsherlik pýnkt qyzmet kórsetetini anyqtalǵan.
«Al ol feldsherdiń aýyldardy aralap shyǵatyn deni durys kóligi de joq. Ne bolmasa turǵyn sany 2-3 myńnan asatyn aýyldar bir ǵana feldsherdiń qyzmetine júginip otyr. Tipti dárigerdiń qyzmetin kórmeıtin aýyl turǵyndary da bar. Munyń bári memleket boıynsha úlken máselege aınalyp otyr. Koronavırýs indeti kezinde osy máselelerdiń óte ózekti ekendigin ańǵardyq», - deıdi Qýanysh Seıitjanov.