Aýyl turǵyndary HQO-ǵa barmaı-aq qajetti anyqtamany ala alady
Agenttik ókilderi Aqmola oblysy Tselınograd aýdany Rodına aýylynyń turǵyndaryna memlekettik qyzmetti elektrondy túrde alý joldaryn úıretti.
«Elbasy Nursultan Nazarbaev óz Joldaýynda halyqtyń tsıfrlyq saýattylyǵyn kóterý týraly tapsyrma bergen bolatyn. Atalǵan tapsyrmany oryndaý aıasynda Memlekettik qyzmet isteri jáne jemqorlyqqa qarsy is-qımyl agenttigi tıisti sharalar júrgizip keledi. Agenttik tóraǵasynyń usynysymen barlyq memlekettik qyzmetshilerge elektrondyq sandyq qoltańba alyp, memlekettik qyzmetti 100% elektrondy túrde alý mindetteldi. Keıinirek quqyq qorǵaý organdary, qorǵanys, Ulttyq ulan jáne dárigerler men muǵalimder arasynda memlekettik qyzmettiń elektrondy túri nasıhattaldy. Endi aýyl turǵyndaryn da qamtýdy jón kórdik», - dedi Agenttiktiń Memlekettik qyzmet kórsetý departamenti dırektorynyń orynbasary Rasýl Medetov Rodına aýylynyń turǵyndarymen kezdesýde.
Medetovtyń aıtýynsha, aýyldyq jerlerde halyqqa qyzmet kórsetý ortalyqtary ashylmaǵan jáne turǵyndar qalaǵa nemese aýdan ortalyǵyna barýǵa májbúr.
«Osy kemshilikti joıý úshin búgin sizderge elektrondy portaldy qalaı qoldanýdy úıretip, qandaı artyqshylyqtary bar ekenin túsindiremiz. Odan bólek, elektrondy úkimet arqyly qyzmet kórsetýshi men qyzmet alýshy arasyndaǵy qarym-qatynasty joıamyz. Osylaısha, sybaılas jemqorlyqtyń da aldy alýǵa nıettimiz. Memlekettik qyzmet boıynsha syn-eskertpeler men usynystaryńyz bolsa, ony da eskeremiz», - dep óz sózin túıindedi R. Medetov.
«Rodına» aýyldyq okrýginiń ákimi Bella Gazdıeva da memlekettik qyzmet kórsetýdi tsıfrlyq formatqa aýystyrýdyń artyqshylyqtary mol ekenin atap ótti.
«Endi bir anyqtama úshin 135 shaqyrymdaǵy aýdan ortalyǵyna barýdyń, talon alyp, kezekke turýdyń qajeti joq. Densaýlyq saqtaý, adamı kapıtal, tıimdi memlekettik basqarý jáne bilim berý syndy Prezıdent joldaýynda kórsetilgen barlyq basymdyqtar tsıfrlandyrýmen tyǵyz baılanysty. Tsıfrlandyrý, elektrondy qyzmet túri ne úshin qajet deseńizder, bul - ashyqtyqqa, jemqorlyqqa tózbeýshilikke bastaıtyn jol. Ómirimizdi de birshama jeńildetedi. Úıde otyryp-aq, qajetti anyqtamany alýǵa bolady», - dedi ol.
Atap ótken jón, búginde eGov mobıldi qosymshasy arqyly 80-nen astam memlekettik qyzmetti tegin alýǵa bolady. Elektrondy úkimet portalynda 700-den astam qyzmet kórsetiledi.
Sondaı-aq, qańtar aıynda Elektrondy úkimet portalynda jeke jáne zańdy tulǵalar kez kelgen azamattyń turǵylyqty mekenjaıy men jyljymaıtyn múlkine qatysty elektrondy anyqtamalardy ala alady. Qoldanýshy atalǵan anyqtamalarǵa tapsyrys bergende azamattardyń telefonyna jáne jeke kabınetine habarlama kelip, úshinshi tulǵalarǵa anyqtama berýge ruqsat suraıdy.
Internet-quraly joq turǵyndar úshin aýyl ákimdigi janynan ózindik qyzmet kórsetý bólmesi ashylǵan. Munda turǵyndar ortaq kompıýter arqyly memlekettik qyzmetti onlaın ala alady.
Rodına aýyldyq okrýgi ardagerler keńesiniń tóraıymy Lıýbov Popelhova búgin elektrondyq sandyq qoltańbasy arqyly mekenjaı týraly anyqtama aldy: «Bizdiń ómirimizge túrli jańalyqtar enip jatyr, oǵan ilese almaı jatyrmyz. Áıtse de, zeınetkerler qýanyshty. Bir túsingenimiz, elektrondy qoltańbany alyp, tirkeýge turýymyz qajet. Nemereler men balalar da kómektesetin shyǵar. Óte paıdaly jańalyq ekeni anyq», - dep aǵynan jaryldy zeınetker.
Jıyn sońynda aýyl turǵyndaryna elektrondy sandyq qoltańbalary júktelgen flesh-kartalar tabys etildi. ESQ arqyly turǵyndar óz úıinde nemese ákimdik janyndaǵy ózindik qyzmet kórsetý bólmesinde onlaın rejımde memlekettik qyzmetti paıdalana alady.
Rodına - Astanadan 70 shaqyrym jerde ornalasqan aýyldyq okrýg. Munda zamanaýı orta mektep, hokkeı korty, jel generatory jáne tanymal «Rodına» JShS sút óńdeý zaýyty bar. Aýylda eki myńǵa jýyq adam turady.