Aýyl sharýashylyǵynda sanaq júrgiziledi –Úkimet otyrysy
«Aýyl sharýashylyǵy kórsetkishterin qalyptastyrý ádistemesi boıynsha da sheshilmegen suraqtar bar. Strategııalyq josparlaý jáne reformalar agenttiginiń aqparaty boıynsha resmı derekkózderdegi málimetterde orta eseppen 20% alshaqtyq bar. Dál osy máseleni sheshý úshin aýyl sharýashylyǵynda sanaq júrgizilýi kerek», - dedi Premer-Mınıstr Úkimettiń búgingi otyrysynda.
Onyń aıtýynsha, Qazaqstanda jún men bylǵary óńdeý salasyn damytýda aıtarlyqtaı áleýet bar. Biraq joǵary qaıta óńdelgen ónim shyǵarýdyń ornyna shıkizat tómen baǵamen eksporttalyp jatyr.
«Bul – kúrdeli problema. Olardy sheshý úshin júıeli tásilder kerek. Jergilikti atqarýshy organdar aýyspaly egistegi, eń aldymen, sýarmaly jerlerdegi jem-shóp daqyldarynyń úlesin keńeıtýi qajet. Jaıylym jerlerdiń ónimdiligin arttyrý kerek. Aýyl sharýashylyǵy mınıstrligi ozyq halyqaralyq tájirıbeni, onyń ishinde tsıfrlandyrýdy eskere otyryp, veterınarııa júıesin reformalaýdyń jol kartasyn ázirleýi kerek», – dedi Á. Smaıylov.
Sonymen birge Aýyl sharýashylyǵy mınıstrligine Strategııalyq josparlaý jáne reformalar jónindegi agenttikpen birge aýyl sharýashylyǵynda sanaq júrgizý, onyń ishinde aqparattyq júıelerdi jańǵyrtý jónindegi jol kartasyn ázirleý tapsyryldy.
«Sanaqqa daıyndyq jumystaryn bıyl bastaý kerek», – dedi Premer-Mınıstr.