Aýyl sharýashylyǵynda ımportty almastyratyn jobalar qandaı

NUR-SULTAN. QazAqparat – 2021 jyly aýyl sharýashylyǵynda túrli baǵyttar boıynsha 79 ınvestıtsııalyq joba iske asyrylady. Bul týraly Úkimet otyrysynda Aýyl sharýashylyǵy mınıstri Saparhan Omarov málim etti, dep habarlaıdy QazAqparat tilshisi.

«Importty almastyrý aıasynda bıyldyń ózinde 35 taýarlyq sút fermasyn, 2 100 gektar baq (óndiristik qýaty – jylyna 73,5 myń tonna alma), 3 et kombınatyn, 5 qus fabrıkasyn, balyq óndiretin 4 nysandy iske qosý josparlanyp otyr, sondaı-aq 1 qant zaýytynyń qurylysy bastalady», - dedi mınıstr.

Onyń aıtýynsha, elimiz boıynsha 2021 jyly túrli baǵyttar boıynsha 79 ınvestıtsııalyq jobany iske asyrý kózdelip otyr.

Budan buryn habarlanǵandaı, iri 7 ekojúıe qurý jónindegi tapsyrmaǵa sáıkes, Soltústik Qazaqstan oblysynda qýaty 300 myń tonna bolatyn dándi daqyldar, Aqmola oblysynda qýaty 200 myń tonna bolatyn maıly daqyldar, Aqtóbe oblysynda 20 myń tonna, Almaty oblysynda 15 myń tonna bolatyn et óndiretin jáne óńdeıtin ekojúıeler qurý jónindegi ınvestıtsııalyq jobalar iske asyrylatyn bolady.