Aýyl sharýashylyǵynda álemdik talaptarǵa saı keletin ónim óndirýge umtylǵan jón - Shókeev

TÚRKІSTAN. QazAqparat – Túrkistan oblysynyń ákimi Ómirzaq Shókeev Keles aýdanynda ótken aýyl sharýashylyǵyna arnalǵan semınar-keńeske qatysyp, damyǵan memleketterden qalyp qoımas úshin sharýalarǵa básekege qabiletti bolý kerektigin atap ótti. Ǵalymdarmen birlese zertteý jumystaryn júrgizip, álemdik talaptarǵa saı keletin ónim óndirýge umtylý qajettigine toqtaldy, dep habarlaıdy QazAqparat tilshisi.

Jergilikti sharýa qojalyǵynyń egis alqabynda bas qosqan bılik ókilderi men agroqurylymdar, ǵalymdar bir alqaptan jylyna 2-3 ónim alý – jobasyn talqylady.

Oblystyń tabıǵı-klımattyq jaǵdaıyn, múmkindigin eskere otyryp qolǵa alynǵan jumys nátıjesinde bıyl 128 aýyl okrýginen 5,2 myń ga alqaptan birneshe ret ónim alynǵan.

2 myńǵa tarta sharýa qojalyǵy osylaısha 220 myń tonnaǵa jýyq ónim jınap, gektarynan ortasha 5 mln teńgeden tabys tapqan.

«Bul jobanyń keleshegi bıik, mańyzy zor. Naǵyz Túrkistan oblysyna arnalǵan joba ekendigin tájirıbe kórsetip otyr. Aýyl sharýashylyǵy salasyn damytý mańyzdy memlekettik basymdyqtardyń biri. Ár aýdan tabıǵı jaǵdaıǵa baılanysty jumys isteýi tıis. Tıimdi de únemdi jańa tehnologııalardy qoldaný arqyly, ónimdi arttyrý kerek. Jańbyrlatyp sýarý tehnologııasynyń tıimdiligin túsinip, Túrkistan tóńireginde, Arys óńirinde, basqa da aýdandar qoldanyp jatyr. Jalpy jańa tehnologııany 11 myń gektar jerge ulǵaıtý kózdelgen», – dedi oblys ákimi.

Jıynda sondaı-aq, ártaraptandyrý - básekelestiktiń basty sharty ekeni aıtyldy.