Aýyl sharýashylyǵyna tsıfrlyq tehnologııalar engiziledi
Senattyń salalyq komıtetiniń tóraǵasy Álı Bektaev ortalyqqa kelýdiń maqsaty – osy taqyryp boıynsha ótetin dóńgelek ústel otyrysyna daıyndyq maqsatynda aýyl sharýashylyǵyna tsıfrlyq tehnologııalardy engizý, ǵaryshtan monıtorıng jasaý men qashyqtan zondtaý tetikterin zerdeleý ekenin atap ótti.
«Aýyl sharýashylyǵynyń ónimdiligi men eńbek ónimdiligin arttyrý jáne jalpy aýyl sharýashylyǵyn damytý – tsıfrlandyrýǵa tikeleı baılanysty. Aýylsharýashylyǵy jerleri men malǵa senimdi baza jasap, qamtamasyz etpeıinshe bizdiń jumysymyz alǵa baspaıdy», - dedi Álı Bektaev.
Senatorlar Aýyl sharýashylyǵy mınıstrligi men S.Seıfýllın atyndaǵy Qazaq agrotehnıkalyq ýnıversıtetiniń basshylyǵymen, sarapshylar qaýymdastyǵy ókilderimen jáne ǵalymdarmen birlese otyryp salalyq mindetterdi sheshý jáne aýyl sharýashylyǵy jerlerin utymdy paıdalaný úshin monıtorıng jasaý, ǵarysh monıtorıngin iske asyrýǵa qatysty máselelerdi talqylady.
Parlamentshiler sondaı-aq «Qazaqstan Ǵarysh Sapary» ulttyq kompanııasy jumysynyń nátıjeleri jáne aýyl sharýashylyǵy maqsatyndaǵy resýrstardy utymdy paıdalaný úshin ǵaryshtan monıtorıng jasaý jónindegi bolashaq jospar týraly da aıtty.
Otyrys barysynda ǵarysh qyzmeti salasyndaǵy zańnamaǵa ǵaryshtan memlekettik monıtorıng jasaý, aqparattyq júıe, atap aıtqanda aýyl sharýashylyǵy boıynsha biryńǵaı operator qurý jóninde ózgeris engizý týraly aıtyldy.
Senator Álı Bektaev barlyq salalyq mekemelerge júktelgen mindetterdi tolyq kólemde oryndaý qajettigin aıta kelip, sonda ǵana oń nátıjege qol jetkizýge bolatynyn atap ótti.
«Problemalyq máseleler kóp. Belgili bir qarajat kerek bolady, tipti zańnamaǵa jáne normatıvtik-quqyqtyq aktilerge ózgerister engizilýi múmkin. Shynynda da munyń barlyǵy aldaǵy ýaqytta salalyq memlekettik organdarmen jumys isteý barysynda anyqtalady, sodan keıin usynystar men ózgerister engizý kerek», - dep atap ótti ol.
Senatorlar otyrysty qorytyndylaı kelip onyń barysynda aıtylǵan barlyq usynystardy Senat komıtetiniń depýtattary muqııat zerdeleıtinin jáne keıinnen múddeli memlekettik organdarǵa jiberiletin usynymdar ázirlenetinin atap ótti.