Aýyl sharýashylyǵyn sýbsıdııalaý: áleýmettik jeli chattary quryldy

ASTANA. QazAqparat – Elimizde aýyl sharýashylyǵy salasyn sýbsıdııalaý máselelerine qatysty áleýmettik jelide jumys chattary qurylyp, odan bólek «bir tereze» qyzmeti iske qosyldy. Bul týraly Aýyl sharýashylyǵy mınıstriniń orynbasary Baǵlan Bekbaýov málim etti, dep habarlaıdy QazAqparat tilshisi.

«Aqparattyq júıeni iske qosqan kezde tehnıkalyq aqaý boldy. Jalpy aqparattyq júıeler satyǵa bólinedi, sol satydan ótý kezinde kemshilikter boldy. Biraq biz olardy túzep, jónge keltirdik. Qazir ár sýbsıdııa boıynsha bólek chat (áleýmettik jeli chaty) qurdyq. Jalpy sany 8 chat bar, onda óte kóp suraqtar kelip jatyr. Keıbiriniń suraǵyna jaýap berilmeı jatqan jaǵdaılarda bar, ony bilemiz. Sol úshin de biz aýyl sharýashylyǵyna qatysty ár sýbsıdııaǵa arnap bólek chat ashtyq», - dedi Baǵlan Bekbaýov Májilistiń agrarlyq máseleler komıtetiniń otyrysynda.

Vıtse-mınıstrdiń aıtýynsha, áleýmettik chatqa kelip túsken saýaldar boıynsha konsýltatsııalyq kómek kórsetilip jatyr.

«Sonymen qatar arnaıy top quryp olardy óńirlerge jiberdik. Qazir olar Túrkistan oblysy, Almaty, Qyzylorda, Jambyl oblysy jáne Shymkent qalasynda júr. Sýbsıdııa boıynsha ótinimin portal arqyly bere almaǵan azamattar jergilikti ákimdikke, aýyl sharýashylyǵy basqarmasyna nemese máselesin áleýmettik jelide kóterip júr. Osynyń aldyn alý úshin biz «bir tereze» qyzmetin quryp otyrmyz. ıAǵnı fermerlerge sol jerde keńes beriledi. Osy aptanyń aıaǵyna deıin elimizdiń ońtústik óńirlerin qamtyp, kelesi aptada basqa da óńirlerde qurylady», - deıdi ol.