Aýyl sharýashylyǵyn qarjylaı qoldaý qory tarapynan bıyl aýyl turǵyndaryn qarjylandyrýǵa 13,7 mlrd. teńgege jýyq qarjy baǵyttalmaq
onyń ishinde respýblıkalyq bıýdjetten - 3,7 mlrd. teńge, óz qarjysynan - 1,4 mlrd. teńge, tartylǵan qarjydan (onyń ishinde - Jumyspen qamtý - 2020 baǵdarlamasymen) - 8,6 mlrd. teńge jumsalmaq.
Respýblıkalyq bıýdjetten bólingen qarjy «Sybaǵa» baǵdarlamasy boıynsha fermerlik sharýashylyqtarǵa iri qara maldyń analyq basyn satypý alý úshin, óz qarjysy - «Eginjaı» baǵdarlamasy boıynsha kóktemgi dala jáne egin jınaý jumystaryna jáne «Sybaǵa» baǵdarlamasyna, tartylǵan qarjy - «Sátti» ıslamdyq qarjylandyrý jáne Jumyspen qamtý - 2020 baǵdarlamalaryna baǵyttalmaq. Bul týraly «QazAgro» ulttyq holdıngi» AQ baspasóz qyzmetinen habarlady.
Búgingi tańda Aýyl sharýashylyǵyn qarjylaı qoldaý qorynyń 14 700 qaryz alýshysy bar. Osy jyldyń aıaǵyna qaraı olardyń sany 20 myńǵa jetedi dep josparlanǵan.
Ótken jyldyń qorytyndysy boıynsha, «Aýyl sharýashylyǵyn qarjylaı qoldaý qory» AQ-nyń aýyldyq shaǵyn nesıeleý naryǵyndaǵy úlesi 61% quraıdy. Qazaqstan Respýblıkasy Statıstıka agenttiginiń málimetinshe, ótken jyldyń úsh toqsanynda shaǵyn nesıeleý uıymdary aýyl turǵyndaryna 1 857,3 mln. teńge bólse, Qordyń osy merzimdegi aýyldyqtarǵa bólgen somasy 2 955 mln. teńgeni qurady. Jalpy, 2005 jyldan bastap, nesıelendirýdiń túrli baǵdarlamalary boıynsha Qor aýyl turǵyndary men aýyl sharýashylyǵy taýarlaryn óndirýshilerge 40 mlrd. teńgeden astam 84 myń qaryz berdi.
Jalpy 2012 jyldyń qorytyndysy boıynsha, «QazAgro» ulttyq holdıngi kompanııalar toby agrarlyq sektordy qoldaýǵa 172 mlrd. teńge jumsady. Sonymen birge, 2012 jyly «QazAgro» tarapynan AÓK sýbektilerin nesıelendirý kólemi 135 mlrd. teńgege jetti. Bul ótken jyldyń deńgeıinen 18% (114,3 mlrd. teńge) artyq. Búgingi tańda Holdıngtiń jıyntyq nesıe qorjyny jalpy AÓK nesıelendirý kóleminiń 46%-dy quraıdy. Bul rette Ulttyq holdıngtiń qarjylandyrý qurylymyndaǵy bıýdjettik qarajattyń úlesi 19%-dy quraıdy, qalǵany - menshikti (34%) jáne tartylǵan (47%) qarajat.
«QazAgro» ulttyq basqarýshy holdıngi» AQ AÓK salasynda qyzmetin júzege asyratyn aktsıonerlik qoǵamdardy tıimdi basqarý arqyly Qazaqstan Respýblıkasynyń agroónerkásiptik keshenin damytýdy yntalandyrý maqsatynda 2006 jyly quryldy. Holdıngtiń quramyna «azyq-túlik kelisim shart korporatsııasy» UK» AQ, «QazAgroÓnim» AQ, «QazAgroQarjy» AQ, «Agrarlyq nesıe korporatsııasy» AQ, «Aýyl sharýashylyǵyn qarjylaı qoldaý qory» AQ, «QazAgroKepil» AQ, «QazAgroMarketıng» AQ kiredi.