Aýyl sharýashylyǵyn damytýdyń jańa paradıgmasyn qurý qajet - Aýyl sharýashylyǵy mınıstri

ASTANA. 3 mamyr. QazAqparat /Aıdar Ospanalıev/ - Ortalyq Azııa elderi ekonomıkalyq ósimge qol jetkizýdi maqsat etip otyrǵan tusta aýyl sharýashylyǵyn damytýdyń jańa paradıgmasyn qurýdyń mańyzy zor.

Bul týraly búgin Aýyl sharýashylyǵy mınıstri Asyljan Mamytbekov elordada ótken «Jańa onjyldyq: Bolashaqtar men talaptar» atty IV Astanalyq ekonomıkalyq forýmnyń paneldik sessııasynda aıtty.

Onyń sózine qaraǵanda, jańa júıe ǵylym men agrotehnıkanyń odan arǵy jetistikterin biriktirip, aýyl sharýashylyǵy salasynyń tótennen kelgen tabıǵı jáne qarjylyq qaýipterge tótep berý qabiletin arttyrar edi. «Sondaı-aq aýyl sharýashylyǵy qoǵamnyń barlyq deńgeıdegi ókilderi úshin ashyq bolýy kerek. Bul jaǵdaı azamattardyń ózderin-ózderi damytýǵa ekonomıkalyq múmkindikter týdyrady»,-dedi mınıstr.