Aýyl sharýashylyǵy: Joǵary qarqyn 3 oblysta baıqaldy

NUR-SULTAN. QazAqparat – Bıyl qańtar aıynda mal sharýashylyǵyndaǵy óndiris kólemi ósti. Bul týraly Úkimet otyrysynda Aýyl sharýashylyǵy mınıstri Saparhan Omarov málim etti, dep habarlaıdy QazAqparat tilshisi.

«Bıyldyń qańtar aıynda jalpy aýyl sharýashylyǵy óniminiń kólemi 2,5 paıyzǵa ulǵaıyp, 170,6 mlrd teńgeni qurady. Bul ósim negizinen mal sharýashylyǵyndaǵy óndiris kóleminiń 2,7 paıyzǵa ulǵaıýy esebinen qamtamasyz etildi. Máselen, et óndirisiniń soıys salmaqtaǵy kólemi 5,3 paıyzǵa, sút 3,8 paıyzǵa ósti. Bul rette, 10,2 mlrd teńgege ósimdik sharýashylyǵy ónimderi óndirilip, naqty kólem ındeksi 100 paıyzdy qurady. Bul kólem aýyl sharýashylyǵy daqyldaryn jabyq topyraqta (jylyjaıda) ósirý esebinen qamtamasyz etildi», - dedi mınıstr.

Onyń aıtýynsha, óńirler bólinisinde respýblıkalyq deńgeıden joǵary qarqyn 3 oblysta baıqalyp. Atap aıtqanda, Aqmola oblysynda 114 paıyzdy, Túrkistan oblysynda 103,2 paıyzdy, Qostanaı oblysynda 102,7 paıyzdy qurady.