Aýyl sharýashylyǵy jobalaryn iske asyrýda 5 oblys kósh bastap tur

NUR-SULTAN. QazAqparat – Bıyl agroónerkásip keshenindegi jol kartalary aıasynda 263 mlrd teńge somasyna 285 jobany iske asyrý josparlanǵan. Bul týraly Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

«Bekitilgen Jol kartalaryna sáıkes 2021 jylǵa 263 mlrd teńge somasyna josparlanǵan 285 jobanyń ishinen bıyldyń 11 aıynyń qorytyndysy boıynsha 241 mlrd teńge somasyna 268 joba paıdalanýǵa berildi. Ákimdikterdiń aqparaty boıynsha osy jyldyń sońyna deıin 22 mlrd teńge somasyna 17 jobany iske asyrý josparlanyp otyr», - dedi E. Qarashókeev Úkimet otyrysynda.

Onyń aıtýynsha, iske asyrylǵan jobalar boıynsha kósh basynda Soltústik Qazaqstan, Qostanaı, Shyǵys Qazaqstan, Aqmola, Qaraǵandy oblystary tur. Sondaı-aq 2021 jylǵy ınvestıtsııalyq jobalardy iske asyrý boıynsha oryndalý deńgeıi shamamen 94 paıyzǵa jetti.

«Investıtsııalyq jobalardyń baǵyttary boıynsha ahýal mynadaı bolyp otyr. 11 aıdyń qorytyndysy boıynsha ósimdik sharýashylyǵy ónimderin óńdeý salasynda 34,3 mlrd teńge somasyna 27 joba, 7,5 mlrd teńge somasyna 6 et kombınaty, baqtar otyrǵyzý salasynda 10,3 mlrd teńge somasyna 14 joba, azyq-túlik ónimderin óndirý salasynda 2,3 mlrd teńge somasyna 6 joba, tuqym sharýashylyǵy boıynsha 1,7 mlrd teńge somasyna 4 joba, sondaı-aq 12,9 mlrd teńge somasyna 28 reprodýktor paıdalanýǵa berildi. Óńirler ákimdikteriniń aqparatyna sáıkes jyl sońyna deıin 22 mlrd teńge somasyna 17 jobany iske asyrý josparlanyp otyr», - dedi mınıstr.