Aýyl sharýashylyǵy jerleriniń salyǵyn aýyl bıýdjetine jiberý usynyldy
«Jer – óndiristiń negizgi quraly. Aýyl turǵyndarynyń áleýmettik-ekonomıkalyq ahýalyn kóteretin de – osy jer. Sondyqtan, aýyl sharýashylyǵy jerlerinen túsetin salyqty tórtinshi deńgeı bolyp esepteletin aýyl bıýdjetine tikeleı túsýin qarastyrý qajet. Qazir aýyl bıýdjeti alty túrli salyqtan quralady. Alaıda onyń jıyntyǵy aýyl ákimi apparatynyń bir aılyq jalaqysyn qamtamasyz etýge de jetpeıdi. Osyǵan oraı, jer reformalary aıasynda salyq kodeksine de tıisti ózgerister engizý kerek dep esepteımiz. Taǵy da qaıtalaımyn, aýyl sharýashylyǵy jerleriniń salyǵy aýyl bıýdjetine tikeleı baǵyttalýy tıis», - dedi J. Daırabaev Jer reformasy jónindegi komıssııanyń birinshi otyrysynda.
Sonymen birge, qaýymdastyq tóraǵasy aýdan ákimdikterindegi jer komıssııalaryn joıýdy talap etti.
«Tsıfrlandyrý qaryshtap turǵan zamanda jemqorlyqqa da, adamı faktorǵa da jol joq. Jerdi jalǵa berý protsesi ádil ári jeńil bolýy kerek. Fermerlerdiń tsıfrlandyrý salasynda tájirıbesi de, biliktigi de az. Sondyqtan, tsıfrlandyrýdy engize otyryp, sharýalardy tegin oqytýdy da qolǵa alǵan jón.
Jalǵa beriletin aýyl sharýashylyǵy jerlerin, shabyndyq bolsyn, jaıylym bolsyn, negizgi aktıv retinde qarastyryp, kepildik baǵasyn eselep ósirý qajet. Bul sharýalardyń nesıe alýyn múmkindigin jeńildetedi», - deıdi J. Daırabaev.
Buǵan deıin J. Daırabaev jerdiń atadan balaǵa mura bolýyn qamtamasyz etýdi usynǵan edi.
Sondaı-aq, spıker jerdi jalǵa alǵandardyń ashyq tizimi bolýy keregin basa aıtty.
Aıta keteıik, búgin Jer reformasy jónindegi komıssııanyń birinshi otyrysy jumysyn bastady. Sanıtarlyq normalardy saqtaý qajettiligine baılanysty komıssııa jumysy Aýyl sharýashylyǵy mınıstrliginiń resmı saıtynda jáne Facebook paraqshasynda onlaın kórsetilýde.