Aýyl sharýashylyǵy jerlerin utymdy paıdalaný tetikteri jetildirildi- Senat
Zań jobasy 13 kodeks pen 29 zańǵa ózgerister men tolyqtyrýlar engizýdi kózdeıdi.
«Usynylǵan ózgerister men tolyqtyrýlar aýyl sharýashylyǵyn qarjylandyrýdyń qoljetimdigi, fıtosanıtarııalyq jáne veterınarııalyq qaýipsizdikti qamtamasyz etý, veterınarııa men agrarlyq ǵylymdy damytý, ákimshilik kedergilerdi joıý, ósimdikter men janýarlar dúnıesin saqtaý jáne damytý jónindegi jańa normalardy engizýdi kózdeıdi. Orman jáne sý sharýashylyǵyn, erekshe qorǵalatyn tabıǵı aýmaqtardy damytý boıynsha ózgerister, sondaı-aq Qazaqstan zańnamasyn EAEO normatıvtik-quqyqtyq aktilerine sáıkes keltirýge baǵyttalǵan ózgerister qarastyrylǵan», - dedi Parlament Senaty Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń múshesi Dúısenǵazy Mýsın.
Buǵan qosa, agroónerkásiptik keshende erikti saqtandyrýǵa kóshý, jer resýrstaryn, ásirese, aýyl sharýashylyǵy maqsatyndaǵy jerlerdi utymdy paıdalaný, aýyl sharýashylyǵy salasyndaǵy kadr daıarlaý júıesin jetildirý usynylǵan.
«Zań jobasynda kózdelip otyrǵan ózgerister zańnamalyq bazany jetildire otyryp, eńbek ónimdiligin eseleýge, sondaı-aq óńdelgen ónim eksportyn ulǵaıtý arqyly agroónerkásip salasynyń básekege qabilettiligin arttyrýǵa qolaıly múmkindikter qalyptastyrý kútilýde», - dedi D. Mýsın.
Eske sala keteıik, bıyl qyrkúıek aıynda «Qazaqstan Respýblıkasynyń keıbir zańnamalyq aktilerine agroónerkásiptik keshendi retteý máseleleri boıynsha ózgerister men tolyqtyrýlar engizý týraly» zań jobasy QR Parlamenti Senatynyń jalpy otyrysynda jan-jaqty talqylanyp, birinshi oqylymda maquldanǵan edi.