Aýyl sharýashylyǵy janýarlary tuqymynyń 17 paıyzy quryp barady - BUU

ASTANA. QazAqparat - BUU-nyń Azyq-túlik jáne aýyl sharýashylyq uıymy (FAO) janýarlar áleminiń bıotúrliligin saqtaý kerektigin eske saldy, ásirese jahandyq jylyný jáne jer sharyndaǵy halyq sanynyń ósýi kezinde bul óte qajet ekendigi atap ótildi. Qazirgi ýaqytta álemde aýylsharýashylyǵy janýarlarynyń barlyq túrleriniń shamamen 17 paıyzy joıylyp ketý aldynda tur.

FAO «Azyq túlik óndirý jáne aýylsharýashylyǵyn júrgizý úshin janýarlardyń genetıkalyq resýrsynyń álemdegi qazirgi jaı-kúıi» atty jańa esebin tanystyrdy. Qujatta jahandyq aýqymda shamamen 17% nemese 1 458 aýyl sharýashylyǵy janýarynyń túrine joıylý qateri tóngeni keltirilgen. Júzge jýyq úı janýarynyń túri 2000-2014 jyldyń aralyǵynda quryp ketken.

Derekterge qarasaq, genetıkalyq joıylýǵa olardy oılanbastan býdandastyra berý sebep bolǵan. Basqa jaqtan ákelingen tuqymdarǵa basa mán berilý, básekege qabileti tómen túrlerge kóńil bólmeý, dástúrli mal sharýashylyǵynyń róliniń tómendeýi de osy kemshilikke ákelip soqtyrǵan.
Esepte joıylyp bara jatqan tuqymdardyń basym bóligi Evropa, Kavkaz jáne Soltústik Amerıkada ekendigi kórsetilgen.
Sarapshylar álemdegi janýarlardyń ártúrliligi azyq-túlik óndirýdi jáne azyq-túlikpen qamtýdy jaqsartýǵa yqpal etetindigin atap ótken. Olar janýarlardyń kóptegen baǵaly túrlerine joıylý qaýpi tónip turǵanyna basa mán berip, qoǵamǵa olardyń genetıkalyq resýrsyn saqtap qalýǵa belsendi at salysýǵa shaqyrady.