Aýyl sharýashylyǵy úshin dızeldiń lıtri 184 teńge bolyp bekitildi

ASTANA. QazAqparat – Bıyl aýyl sharýashylyǵy salasy úshin dızel otynyna birkelki baǵa bekitildi. Bul týraly Aýyl sharýashylyǵy mınıstri Erbol Qarashókeev málim etti, dep habarlaıdy QazAqparat tilshisi.

«Kóktemgi egis jumystary boıynsha óńirlerge 413,0 myń tonna dızel otyny bólindi. Bul – ótken jylǵa qaraǵanda 13,0 myń tonnaǵa kóp. Energetıka mınıstrligi jáne munaı óńdeý zaýyttarymen aqyldasa kele dızeldiń tonnasy 222,0 myń teńge nemese lıtri 184 teńge bolyp bekitildi. Bıyl arzandatylǵan janar-jaǵarmaı tek ońtústik oblystarǵa ǵana emes, soltústik óńirlerge de aqpannan bastap jóneltile bastady», - dedi Erbol Qarashókeev Úkimet otyrysynda.

Odan ári mınıstr kóktemgi egistikke daıyndyq barysyna toqtaldy.

«Egis naýqanyna kirisýge 160,0 myń traktor, 5 myńnan astam joǵary ónimdi egis kesheni, 78 myń tuqym sepkish jáne 226 myń topyraq óńdeý quraly daıyndaldy. Sonymen qatar, bir mezgilde birneshe tehnologııalyq operatsııany oryndaıtyn zamanaýı egis keshenderiniń 5 myńnan astamy bar. Jalpy, qazirgi kúni kóktemgi egis jumystaryna tehnıkalardyń daıyndyǵy – shamamen 93%. Jumys bastalǵansha tehnıka 100% daıyn bolady», - deıdi ol.

Buǵan deıin vedomstvo basshysy bıyl egistik alqabynyń 68,6 myń gektarǵa ulǵaıatynyn aıtqan edi.