Aýyl sharýashylyǵy tehnıkasyn jeńildikpen jalǵa alý tetigi qabyldanbaq

NUR-SULTAN. QazAqparat – Aýyl sharýashylyǵy mınıstrliginde ÓKM Operatorynyń qarajaty esebinen otandyq aýyl sharýashylyǵy tehnıkasyn satyp alý maqsatynda jeńildetilgen nesıe tetigin engizýge qatysty keńes ótti, dep habarlaıdy QazAqparat tilshisi.

«Osy keńestiń qorytyndysy boıynsha taraptar «Jasyl Damý» AQ qarajaty esebinen aýyl sharýashylyǵy tehnıkasyn jeńildikpen jalǵa berý tetiginiń negizgi tásilderin talqylap, kelisti. Aýyl sharýashylyǵy tehnıkasyn jeńildiktilgen tártipte lızıngke alý tetigin bıylǵy jappaı egin jınaý jumystary bastalǵanǵa deıin, ıaǵnı qysqa merzimde qabyldaý josparlanyp otyr. Baǵdarlamanyń sharttary shaǵyn jáne orta aýyl sharýashylyǵy qurylymdarynyń tehnıkany satyp alýyn yntalandyrýǵa baǵyttalady», - delingen mınıstrlik málimetinde .

Bul baǵdarlamaǵa shamamen 40 mlrd teńge bólý josparlanyp otyr. Qarjylandyrýdy «Báıterek» UBH» AQ enshiles uıymdary júzege asyratyn bolady.

Atalǵan keńeske Indýstrııa jáne ınfraqurylymdyq damý mınıstrliginiń, «Báıterek» UBH» AQ, «Ónerkásipti damytý qory» AQ, «QazAgroQarjy» AQ, «Jasyl Damý» AQ jáne Qazaqstan fermerler odaqtary qaýymdastyǵynyń ókilderi qatysty.

Esterińizge sala keteıik, Prezıdent Qasym-Jomart Toqaev Úkimettiń keńeıtilgen otyrysynda otandyq aýyl sharýashylyǵy tehnıkasyn satyp alý úshin jeńildetilgen nesıe berý tetigin engizýdi tapsyrǵan bolatyn.