Aýyl sharýashylyǵy taýaryn óndirýshilerge arzan dızel otyny bólindi
«Búkil álemdi sharpyǵan pandemııaǵa baılanysty janar-jaǵarmaıǵa tutynýshylyq aıtarlyqtaı tómendedi. Elimizde engizilgen karantındik sharalarǵa baılanysty ótken aılarda munaı ónimderin tutyný aıtarlyqtaı azaıdy. Qazaqstanda janar-jaǵarmaıdy tutynýdyń tómendeýi munaıdy qaıta óńdeýge arnalǵan josparly kórsetkishterdi ózgertý qajettiligine alyp kelgen joq, ıaǵnı ol 17 mln tonna deńgeıinde qaldy», - deıdi QR Energetıka mınıstri Nurlan Noǵaev.
Onyń aıtýynsha, qazaqstandyq munaı óndeý zaýyttaryn jabdyqtaý nátıjesinde búgingi tańda ishki naryqtyń qajettiligin tolyǵymen ózimiz qamtamasyz etip otyrmyz.
«2019 jyldyń qorytyndysy boıynsha óz elimizde óndirilgen benzın, dızel otyny, avıakerosın jáne mazýtpen naryqtyń qamtamasyz etilýi 100%-ǵa jetti. 2019 jyly shildede tyıym salyný alynǵannan keıin Eýropa jáne Ortalyq Azııa elderine benzınniń eksporty bastaldy. Byltyr benzın eksportynyń kólemi 181 myń tonnany qurady. Otandyq munaı óńdeý zaýyttarynyń turaqty munaı óńdeýdi qamtamasyz etýine jáne munaı ónimderi qoımalarynyń tolyp ketýine jol bermeý maqsatynda mınıstrlik múddeli organdarmen birlesip mynadaı sharalar qabyldady: birinshi, munaı ónimderin avtokólikpen Qazaqstannan tys jerge áketýge salynǵan tyıym alynyp tastaldy. Munaı ónimderin Keden odaǵy elderi sheginen tys jerge áketýge salynǵan tyıym alynyp tastaldy. Eksportqa ótkiziletin benzın men dızel otyny boıynsha aktsızdeletin taýar óndirýshiler aktsız tóleýden bosatyldy. Reseıden Qazaqstanǵa benzın men dızel otynyn temirjolmen jetkizýge tyıym salyndy. Munaı ónimderine, onyń ishinde benzın, dızel otyny men mazotqa kedendik áketý bajynyń mólsherlemesi joıyldy. Memleket basshysynyń tapsyrmasyna sáıkes, mınıstrlik Aýyl sharýashylyǵy mınıstrligimen birigip kóktemgi egis jumystaryn júrgizý úshin aýyl sharýashylyǵy taýar óndirýshilerine 1 lıtri úshin 165 teńge arzandatylǵan baǵamen 386 tonna dızel otynyn bóldi. Qazirgi tańda mınıstrlikke qosymsha 60 myń tonna dızel otynyn bólý jóninde usynys kelip tústi. Biz bul máseleni qarastyrýdamyz. Bul sharalar kóktemgi egis jumystaryn turaqty júrgizýge baǵyttalǵan», - deıdi ol.