Aýyl sharýashylyǵy salasyndaǵy saýda qazaq-tájik yntymaqtastyǵynyń negizi bolýǵa tıis - Jumanǵarın

ASTANA. QazAqparat – Aýyl sharýashylyǵy salasyndaǵy saýda qazaq-tájik yntymaqtastyǵynyń negizi bolýǵa tıis. Bul týraly Qazaqstan-Tájistan bıznes forýmynda Premer-Mınıstrdiń orynbasary - Saýda jáne ıntegratsııa mınıstri Serik Jumanǵarın aıtty, dep habarlaıdy QazAqparat tilshisi.

«Qazaqstan belgili bir ýaqyt ishinde óziniń avtomobıl ónimderin Tájikstan naryǵyna eksporttap kele jatqanyn atap ótken jón. 2017-2018 jyldary Tájikstanǵa JAC markaly 147 jáne Peugeot markaly 10 avtomobıl jetkizildi. 2021 jyldyń sońynda «SaryarqaAvtoÓnerkásip» JShS shyǵarǵan JAC brendiniń qosymsha 175 avtokóligin jetkizýge kelisimshartqa qol qoıyldy. Onyń 50-i 2022 jyly Tájikstanǵa jóneltildi. Qazaqstanda qurastyrylǵan qalalyq JAC S3 krossoveri Dýshanbe qalasynyń taksoparkin qalyptastyryp otyr», - dedi vıtse-premer.

Onyń atap ótýinshe, Qazaqstan Tájikstanǵa saztopyraqty turaqty negizde jetkizip keledi.

«Aýyl sharýashylyǵy salasyndaǵy saýda ekijaqty yntymaqtastyǵymyzdyń negizi bolýǵa tıis. Ótken jyly agroónerkásip kesheni ónimi saýdasynyń 40 paıyzǵa artqany baıqaldy. Bul – ózara saýdanyń jalpy kóleminiń jartysynan astamy, ıaǵnı 578 mln dollar», - dedi Serik Jumanǵarın.