Aýyl sharýashylyǵy salasynda oń ózgerister bar – Ekonomıka mınıstri

NUR-SULTAN. QazAqparat – Aýyl sharýashylyǵy salasynda 2,4% ósim baıqalyp otyr. Bul týraly Úkimet otyrysynda bıylǵy jeti aıdaǵy áleýmettik-ekonomıkalyq damýdy talqylaý kezinde Ulttyq ekonomıka mınıstri Áset Erǵalıev málim etti, dep habarlaıdy QazAqparat tilshisi.

«Aýyl sharýashylyǵynda 2,4% ósim baıqalyp otyr. 13 óńirde oń dınamıka tirkeldi. Eń joǵary ósimdi Aqmola, Jambyl jáne Pavlodar oblystary kórsetti», - dedi Á. Erǵalıev.

Budan bólek ol 7 ekonomıkalyq kórsetkish boıynsha óńirler arasynda jalpy jaǵdaıǵa toqtaldy.

«Barlyq 7 kórsetkish boıynsha oń ósý 4 óńirde – Almaty, Jambyl jáne Mańǵystaý oblystarynda, sondaı-aq Shymkent qalasynda baıqaldy. Al, 6 kórsetkish boıynsha 9 óńirde ósý baıqalady. Olar Aqmola, Aqtóbe, Qaraǵandy, Qostanaı, Qyzylorda, Pavlodar, Soltústik Qazaqstan jáne Túrkistan oblystary, sondaı-aq

Nur-Sultan qalasy. 3 óńirde 5 kórsetkish boıynsha ósý tirkeldi. Batys Qazaqstan oblysynda tek 3 kórsetkish boıynsha ósý baıqalyp otyr» - dedi mınıstr.

Onyń paıymynsha, jergilikti atqarýshy organdarǵa tıisti is-sharalarǵa nazar aýdarý usynylyp otyr. Atap aıtqanda:

1. Belsendi túrde ınvestıtsııalar tartý, ınvestorlarmen naqty jumys júrgizý, árbir ınvestıtsııalyq jobanyń ekonomıkalyq turǵyda tıimdiligin arttyrý.

2. Shaǵyn jáne orta bızneske baılanysty memlekettik qoldaý quraldaryn tıimdi túrde iske asyrý jáne ASHYQ jobasyn keńeıtý.

3. Ýaqytyly egin jınaýdy jáne qurylys jumystarynyń maýsymyn tıimdi júrgizýdi qamtamasyz etý.

4. «Eńbek» jáne «Jumyspen qamtý jol kartasy» baǵdarlamalary sheńberinde turaqty jáne ýaqytsha jumysqa ornalastyrýdy qamtamasyz etý.

5. Azyq-túlik taýarlaryna turaqty monıtorıng jáne baǵanyń shamadan tys ósýin tejeý boıynsha sharalar qabyldaý.