Aýyl sharýashylyǵy salasynda 143 qyzmetker jemqorlyq úshin sottalǵan
QR Aýyl sharýashylyǵy mınıstrliginde sybaılas jemqorlyqqa qarsy is-qımyl máseleleri boıynsha keńes ótti.
QR Sybaılas jemqorlyqqa qarsy kúres agenttigi basshysynyń birinshi orynbasary Oljas Bektenov áýeli salada halyqqa kórsetiletin qyzmet túrlerin tsıfrlandyrý boıynsha naqty jumys júrip jatqanyn atady. Soǵan qaramastan, jemqorlyq faktileri áli de saqtalýda.
«Aýyl sharýashylyǵy salasynda da jemqorlyq tamyrymen joıyldy dep aıta almaımyz. Sońǵy kezde jergilikti salalyq organdarda zańbuzýshylyq kóp tirkelip jatyr. Sondyqtan, búgingi keńeske jergilikti ákimdikterdiń onlaın-rejimde qatysýyn suradyq», - dedi agenttik ókili.
Oljas Bektenovtyń aıtýynsha, sońǵy 4 jylda salada 500-den astam jemqorlyq faktisi tirkelgen.
«Muny bizdiń jedel tergeý statıstıkasy da, sot protsesteriniń statıstıkasy da rastap otyr. Azamattar tarapynan da bizdiń agenttikke, tipti QR Prezıdenti ákimshiligine shaǵymdar túsip jatyr. Sońǵy 4 jylda aýyl sharýashylyǵy salasynda 500-den astam jemqorlyq faktisi tirkelgen. 221 laýazymdy tulǵa qylmystyq jaýapkershilikke tartylyp, 143 adam sottalǵan. Bul zańbuzýshylyqtarǵa mınıstrliktiń salalyq qurylymdarynan da, jergilikti memlekettik organdar tarapynan da jol berilip otyr», - dedi Oljas Bektenov.