Aýyl sharýashylyǵy salasyna arnaıy bank ashý kerek - senator

NUR-SULTAN. QazAqparat - Senator Murat Baqtııaruly agrarlyq sala eńbekkerlerin qarjylaı qoldaýdy kúsheıtý úshin Qazaqstanda aýyl sharýashylyǵy bankin qurýdy usyndy. Ol bul týraly elimizdiń Premer-Mınıstri Álıhan Smaıylovtyń atyna depýtattyq saýalynda aıtty, dep habarlaıdy QazAqparat tilshisi.

Depýtattyń pikirinshe, ol qazirgi tańda asa qajet salaǵa aıtarlyqtaı qoldaý kórseter edi.

Bul másele jaqynda senatorlardyń Qyzylorda oblysyna barǵan jumys sapary kezinde kóterilgen bolatyn. Dıqandar aımaqtaǵy negizgi agrarlyq daqyly kúrish ekenin aıta kelip, osy daqyl oblysta ishki naryq suranysynyń 80%-na deıin qamtamasyz etetinine toqtaldy. Alaıda jyl ótken saıyn jumys isteý qıyndaı túsýde. Óńirdegi sýarmaly jerlerdiń jaǵdaıy óte nashar, sýarmaly jerlerde sý qubyry men káriz júıesi tıisti qarjylandyrýdyń joqtyǵynan ýaqytynda tazartylmaıdy. Bul qubyrlardyń qoqysqa tolyp ketýi men shamadan tys tuzdanýǵa ákeledi.

«Damyǵyn elderde 1 tekshe metr sýǵa 4-6 keli aýyl sharýashylyǵy ónimi óndirilse, bizde nebári 0,4-0,8 keli, ıaǵnı 6 ese az óndiriledi. Al damyǵan elderde 1 keli ónim óndirýge 160-400 lıtr sý jumsalsa, bizde 1200-2500 lıtr sý jumsalady. Demek, elimizdegi sýarmaly jerlerdiń gıdromelıoratıvtik ahýaly qanaǵattanarlyqsyz jaǵdaıda. Bul Úkimet tarapynan nazar aýdararlyq másele», - dedi depýtat.

Onyń aıtýynsha, mıneraldy tyńaıtqyshtardyń qymbattyǵy da bólek bir problema. Bıyl olardyń baǵasy ótken jylmen salystyrǵanda 2,5-3 ese ósti. Bul salada deldaldar mańyzdy ról atqarady, sonyń saldarynan ónimniń quny edáýir ósip ketedi.

Depýtat osyǵan baılanysty óz saýalynda «Melıoratsııa týraly» zańdy qabyldaý qajettigin atap ótti. Ol zańda memlekettik organdar men jer paıdalanýshylardyń jerdi melıoratsııalaý jónindegi jaýapkershiligi naqtylanýy tıis.

Sonymen qatar senator elimizde aýyl sharýashylyǵy bankin ashý qajettigine de nazar aýdardy.

«Bizdiń aýyl sharýashylyǵy óndirýshileri Evrazııalyq ekonomıkalyq odaqqa engen Reseı, Belarýs elderiniń aýyl sharýashylyǵy taýarlaryn óndirýshilerimen básekege túse almaı otyr. Óıtkeni, bul elderdiń sharýalarynyń jeri men múlkin kepildikke alyp, uzaq merzimge arzan nesıe beretin, bólimsheleri barlyq aýdandarda ornalasqan agrobankteri qyzmet etedi. Osy kezge deıin Parlament qabyrǵasynda birneshe ret kóterilip, biraq sheshimin tappaı jatqan bizdiń elimizde de osyndaı arnaıy mamandandyrylǵan aýyl sharýashylyǵy bankin ashý máselesin qarap, onyń oń sheshilýin búkil sharýalar kútip otyrǵanyna nazaryńyzdy aýdarǵymyz keledi», - dedi M. Baqtııaruly.