Aýyl sharýashylyǵy salasyn sýbsıdııalaý elektrondy formatqa kóshedi

ASTANA. QazAqparat – Elimizde aýyl sharýashylyǵyna memleketten sýbsıdııa alý protsesi jeńildeı túspek. Bul týraly QR Aýyl sharýashylyǵy mınıstri Erbol Qarashókeev málim etti, dep habarlaıdy QazAqparat tilshisi.

«Memleket basshysynyń tapsyrmasyna sáıkes aýyl sharýashylyǵy salasyn sýbsıdııalaý máselelerin quramynda 160-tan astam maman bar jumys toby qarap jatyr. Osyǵan deıin 9 otyrys ótti. Sala mamandarynyń ótinish-usynystary nazarǵa alynyp, sýbsıdııalaý salasyna ózgerister engizildi. Aıtar bolsaq, atalǵan salada sybaılas jemqorlyq áreketteriniń aldyn alý maqsatynda sýbsıdııa tolyqtaı elektrondy formatqa kóshedi. ıAǵnı sýbsıdııaǵa ótinish berý, qabyldaý jáne somany rastaý adamnyń qatysýynsyz ótedi», - dedi Erbol Qarashókeev Májiliste ótken dóńgelek ústel barysynda.

Mınıstrdiń sózine sensek, buǵan deıin aýyl sharýashylyǵy salasyn sýbsıdııalaý protsesi 3-4 aı ýaqyt alsa, endi 1 aıǵa deıin qysqarady.

«Baqylaý organdary tarapynan aıtylǵan eskertýlerge qulaq asyp, tıimsiz, ózekti emes jáne baqylaýy qıyn sýbsıdııa túrleri qysqartyldy. Qarjy bólýge kelsek, aýyl sharýashylyǵy salalary boıynsha sol burynǵy somalar saqtalyp qalady. Baǵytyna qaraı 15 paıyzdan 80 paıyzǵa deıin ınvestıtsııalyq sýbsıdııa qarastyrylǵan», - deıdi ol.

Aıta ketsek, Májiliste «Agroónerkásiptik keshendi sýbsıdııalaýǵa arnalǵan jańa tásilder» taqyrybynda dóńgelek ústel ótip jatyr.

Jıynǵa qatysýshylar aýyl sharýashylyǵy salasyn sýbsıdııalaýdaǵy problemalar, ımportty almastyrý perspektıvalary, ónim baǵasyn qalyptastyrý jáne basqa máselelerdi talqylap jatyr.