Aýyl sharýashylyǵy salasy alǵa bassa, elimiz de damıdy - Amangeldi Baıanov

ORAL. QazAqparat - Qazaqstan Prezıdenti Nursultan Nazarbaevtyń «Qazaqstannyń úshinshi jańǵyrýy: jahandyq básekege qabilettilik» atty Joldaýynda atalyp ótilgenindeı, elimizdegi agroónerkásip kesheniniń bolashaǵy zor. Aýyl sharýashylyǵynda kózdelip otyrǵan reformalar eń aldymen sol aýyldyq eldi mekenderde turyp jatqan adamdarǵa ıgilik ákeledi. Bul týraly «Aýyl» partııasy oblystyq fılıalynyń tóraǵasy Amangeldi Baıanov málim etti, dep habarlaıdy «QazAqparat» HAA tilshisi.

Onyń aıtýynsha, budan buryn da aýyl sharýashylyǵy taýaryn óndirýshilerge, sonyń ishinde tórt túlik mal ósirip, odan mol paıda tabamyn deýshilerge memleket tarapynan qoldaý kórsetilip kele jatqany belgili. Endi ekologııalyq jaǵynan taza taǵamdar óndirýge basymdyq berilip otyr. Shyndyǵynda da ónimderimiz básekege qabiletti bolmasa, qazirgideı shet elden túrli taýarlar tasqyny azaımaı turǵan mezgilde alǵa basý qıyn. Bul rette Elbasymyz Úkimet pen ákimderge naqty tapsyrmalar berdi. Aldymen sýbsıdııalardy bólý máselesin qaıta qarastyryp, birtindep ónimdi saqtandyrýǵa kóshý kerektigi aıtyldy. Sondaı-aq bes jyl ishinde 500 myńnan astam jeke úı sharýashylyqtary men shaǵyn fermerlerdi kooperatıvterge biriktirý de mańyzdy. Sońǵy kezde taram-taram bolyp ketken sharýalardyń basyn qosý maqsatynda qadamdar jasalýda. Bul durys. Óıtkeni jahandaný kezindegi qubylystarǵa osylaısha qarsy turýǵa bolady. Eger aýyl turǵyndarynyń malyn kóbeıtip, odan alynatyn ónim túrlerin ótkizýge jaǵdaı jasalsa, olardyń ál-aýhaty arta túseri anyq. Osy oraıda aýyl sharýashylyǵy maqsatyndaǵy jerlerdi tıimdi paıdalanýdyń da máni zor. «Jaıylym týraly» Zańǵa sáıkes mal jaıylatyn jerler rettelse, tipti jaqsy bolar edi.

«Biz «Aýyl» partııasynyń óńirdegi belsendi múshelerimen birge Elbasy Úndeýi men Joldaýyn talqylap, aldaǵy is-josparlardy belgiledik. «Aýyl» partııasy eń aldymen aýyl adamdarynyń múddesin kózdeıtindikten, biz sol elge jasalatyn jaqsylyqtyń jalǵasatynyna qýanyp otyrmyz. Osyǵan baılanysty arnaıy keste boıynsha aýyl-aımaqqa shyǵyp, turǵyndarmen kezdesetin bolamyz. Olardyń usynys-pikirlerin tyńdap, elimizde engizilgeli otyrǵan saıası reforma men Joldaýdaǵy basym baǵyttar jóninde aıtyp, óz oı-tolǵamdarymyzben bólisemiz», dedi «QazAqparat» tilshisine Amangeldi Baıanov.