Aýyl sharýashylyǵy: Pavlodar oblysynda 2025 jylǵa deıin 26 ınvestıtsııalyq joba iske qosylmaq

PAVLODAR. QazAqparat – Pavlodar oblysynyń aýyl sharýashylyǵy salasynda 2025 jylǵa deıin quny 187,8 mlrd teńge bolatyn 26 ınvestıtsııalyq joba iske qosylady. Bul týraly óńirge jumys saparymen barǵan Aýyl sharýashylyǵy mınıstri Erbol Qarashókeev málimdedi, dep habarlaıdy QazAqparat vedomstvonyń baspasóz qyzmetine silteme jasap.

Sonymen birge, mınıstr jańa kásiporyndar maýsymaralyq kezeńde aýyl sharýashylyǵy ónimderiniń tapshylyǵyn boldyrmaýǵa jáne oblys pen astana bazarlaryndaǵy baǵany turaqtandyrýǵa, sondaı-aq 1 myńnan astam jumys ornyn qurýǵa múmkindik beretinin aıtty.

Erbol Qarashókeev jumys sapary aıasynda birneshe sharýa qojalyǵynda, sonyń ishinde mal jáne ósimdik sharýashylyǵy fermalarynda, kókónis qoımasynda bolyp, jańa sút-taýar fermasynyń ashylýyna qatysty.

Jańa nysan Aqtoǵaı aýdany Jolaman aýylynda ashyldy. Jobanyń quny – 6 mlrd teńge, onyń 5 mlrd teńgesi – «Agrarlyq nesıe korporatsııasy» AQ-nyń qaryz qarajaty. Ferma jyl saıyn 8,9 mln lıtrge deıin shıki sút shyǵara alady.

Jalpy, Úkimet tarapynan kórsetilip jatqan sharalardyń arqasynda Pavlodar oblysy AÓK-ti damytýdyń oń nátıjelerin kórsetip otyr. Óńirge ınvestıtsııalyq sýbsıdııalaýǵa 9,3 mlrd teńge, nesıeler men lızıng boıynsha syıaqy mólsherlemelerin sýbsıdııalaýǵa 6,3 mlrd teńge, mal sharýashylyǵyn sýbsıdııalaýǵa 8 mlrd teńge, ósimdik sharýashylyǵyna shamamen 5,3 mlrd teńge bólindi. Osynyń barlyǵy túrli daqyldardyń egis alqaptaryn ulǵaıtýǵa, jańa sút-taýar fermalary men bordaqylaý alańdaryn ashýǵa múmkindik berdi.

Mınıstr astyq jınaý naýqanynyń barysymen de tanysty. Búgingi kúni 610,9 myń ga astyq jınalǵan, bul – jospardyń 64%-y. Ortasha ónimdilik gektaryna 9,8 tsentner bolǵan kezde 600,5 myń tonna astyq bastyryldy, 12,5 myń ga alańdaǵy kartop egininiń jartysy jınaldy. Oblysta 3,7 myń ga alqaptan 107,5 myń tonna kókónis jınaldy, bul – jalpy alańnyń 50%-y.

Aýyl sharýashylyǵy taýaryn óndirýshilerimen kezdesýde Erbol Qarashókeev óńirde qant qyzylshasyn ósirý áleýetin talqylady. Qazirgi ýaqytta oblystyń sýarmaly jerleriniń aýdany – shamamen 64 myń ga, sondyqtan bul baǵyttaǵy joba sátti iske asyrylýy múmkin.

Bıyl aýyl sharýashylyǵyna qosymsha qarajat bólindi. Qazirgi ýaqytta sýbsıdııalaýdyń jalpy kólemi – 451 mlrd teńge. «Keń dala» baǵdarlamasy boıynsha qarjylandyrý 2 esege artyp, 140 mlrd teńge boldy. Sondaı-aq, forvardtyq satyp alýǵa bólingen soma ótken jylmen salystyrǵanda 2 esege ósip, 80 mlrd teńgege jetti. Al, kredıtter men lızıng boıynsha syıaqynyń qoldanystaǵy naryqtyq mólsherlemesi 20% bolǵan kezde fermerler úshin nebári 6% mólsherleme kózdelgen, qalǵanyn memleket óteıdi.