Aýyl sharýashylyǵy ónimderiniń saýdasyn keńeıtýdi yntalandyrý qajet - QR Prezıdenti

SAMARQAND. QazAqparat – Qazaqstan Prezıdenti Qasym-Jomart Toqaev Shanhaı Yntymaqtastyǵy Uıymyna múshe memleketter basshylary Keńesiniń keńeıtilgen quramdaǵy otyrysynda azyq-túlik jáne energetıkalyq qaýipsizdik máselelerine arnaıy toqtaldy, dep habarlaıdy QazAqparat Aqordaǵa silteme jasap.

«ShYU memleketteri – álemdegi eń iri aýyl sharýashylyǵy ónimderin óndirýshi ári eksporttaýshy elder. Biz ShYU aımaǵynda da, odan tys jerlerde de aýyl sharýashylyǵy ónimderiniń saýdasyn keńeıtýdi yntalandyrýymyz kerek. Memleketterimizdiń halyqaralyq azyq-túlik óndirisi men jetkizý tizbeginiń úzdiksiz jumys isteýin qamtamasyz etýge qatysýy álemdik azyq-túlik naryǵyndaǵy turaqtylyqty saqtaýǵa kómektesedi», - dedi Prezıdent.

Sondaı-aq, Memleket basshysy sý resýrstaryn ıgerý men utymdy paıdalanýǵa kóbirek kóńil bólý qajettigin aıtty.

«ShYU-nyń Energetıkalyq strategııasyn birlesip ázirleý jahandyq jáne óńirlik energetıkalyq tepe-teńdikti qamtamasyz etýge yqpal etedi. Biz sondaı-aq, Jańartylatyn energııa kózderi salasyndaǵy yntymaqtastyq baǵdarlamasyn qabyldaýdy ózekti dep sanaımyz», - dedi Qasym-Jomart Toqaev.

Buǵan deıin habarlaǵanymyzdaı, QR Prezıdenti Qasym-Jomart Toqaev Shanhaı yntymaqtastyǵy uıymyna múshe memleketter basshylary keńesiniń shaǵyn quramdaǵy otyrysyna qatysty.