Aýyl sharýashylyǵy mınıstri túrkistandyq jas dıqanǵa galstýgin syılady

TÚRKІSTAN. QazAqparat - QR Aýyl sharýashylyǵy mınıstri Erbol Qarashókeev Túrkistan oblysyna arnaıy is-saparmen keldi. «Egisten sórege deıin» jobasy aıasynda ótken semınar keńeske qatysqan ol egistik alqabynda bolyp, dıqandarmen kezdesti, dep habarlaıdy QazAqparat tilshisi.

Semınar-keńeske qatysýshylardy ásirese, Túrkistan óńirinde júzege asyrylyp jatqan úıirgelik sharýashylyqty damytý jobasy qyzyqtyrdy. Osy jumys qalaı júzege asyrylǵanyn kórý úshin semınarǵa qatysýshylar Saıram aýdanyndaǵy 2 sharýanyń úıinde bolyp, sharýashylyǵymen tanysty. Oǵan QR Aýyl sharýashylyǵy mınıstri Erbol Qarashókeev pen óńirlerden kelgen kásipkerler, ákim orynbasarlary da arnaıy bardy.

Túrkistan oblysynyń ákimi Ómirzaq Shókeev bul bastama arqyly jumyssyzdar sany azaıatynyn, otandyq azyq-túliktiń kólemi artatynyn jáne eldiń áleýeti kóteriletinin jetkizdi. Saıram aýdanynyń ákimi Ulasbek Sádibekov aýdan kóleminde aýyl sharýashylyǵyn negizgi kásipke aınaldyrǵan otbasylar kóp ekenin aıtty.

Semınar qatysýshylary sharýalarǵa suraqtaryn qoıyp, tıisti keńesterin aldy. Túrkistan oblysynyń dıqandary men kásipkerleriniń eńbegine tánti bolǵan QR Aýyl sharýashylyǵy mınıstri Erbol Qarashókeev dıqanshynyń ulyna óziniń galstýgin tartý etti.

Túrkistan oblysynda jeke qosalqy úı sharýashylyqtaryn damytý, ıaǵnı, úıirgelik sharýashylyǵy jaqsy damyp keledi. Bul jobada tamshylatyp sýǵarý ádisi qoldanylady. Jobaǵa «Eńbek» baǵdarlamasymen jańa bıznes-ıdeıalardy iske asyrý memlekettik granty esebinen qoldaý kórsetilýde. 2021 jyldyń ózinde jańadan 525 birlik otbasylyq sharýashylyq quryldy, onyń ishinde 162 birlik úı sharýashylyqtaryna granttyq qoldaýlar kórsetilgen. Óńirde 257 myńnan astam úı sharýashylyǵy bar. Jyl saıyn qosalqy úı sharýashylyqtarynda 310 myń tonnaǵa jýyq ónim óndiriledi. Bul – jalpy kókónis óniminiń 30%-y.