Aýyl sharýashylyǵy mınıstri kókónis baǵasy 30-100 teńgege deıin arzandaǵanyn aıtty

ASTANA. QazAqparat – QR Aýyl sharýashylyǵy mınıstri Erbol Qarashókeev bıylǵy kókónis jınaý jumysy týraly aıtyp berdi, dep habarlaıdy QazAqparat tilshisi.

«Qazir elimizde kókónis jınaý jalǵasyp jatyr. 22 qyrkúıektegi jaǵdaı boıynsha 1,3 mln tonna pııaz, shamamen 2,4 mln tonna kartop, 348 mln tonna sábiz jáne 470 mln tonna qyryqqabat jınaldy. Búginde kókónis baǵasynyń arzandaýy baıqalyp otyr. Mysaly, kókónis ósirýshi óńirlerde pııaz baǵasy 30-50 teńge, kartop 95-100 teńge, sábiz 85-100 teńge jáne qyryqqabat baǵasy 50 teńge turady», - dedi Erbol Qarashókeev ortalyq kommýnıkatsııalar qyzmeti alańynda ótken baspasóz máslıhatynda.

Mınıstrdiń aıtýynsha, joǵaryda atalǵan baǵany óndirýshilerdiń ózderi qoıyp otyr.

«Kókónis baǵasynyń ósýine jol bermeý jáne qysta, kóktemde tapshylyqqa tap bolmaý maqsatynda óńir ákimdikterimen kelisimshart jasalyp, qor jınaý jumysy júrip jatyr», - deıdi ol.