Aýyl sharýashylyǵy mashınasyn jasaýdy damytýdyń ulttyq ortalyǵy qurylady

NUR-SULTAN. QazAqparat – Aýyl sharýashylyǵy mashınasyn jasaýdy damytýdyń ulttyq ortalyǵy qurylady. Maqsat – otandyq aýyl sharýashylyǵy tehnıkalaryn jasaýdy qoldaý. Bul týraly Indýstrııa jáne ınfraqurylymdyq damý mınıstrliginiń «Ashyq saǵat alańynda» aıtyldy, dep habarlaıdy QazAqparat vedomstvonyń baspasóz qyzmetine silteme jasap.

«Elimizde aýyl sharýashylyǵy mashınasyn jasaýdy damytý – basymdyqqa ıe memlekettik mindettiń biri. Osy rette otandyq aýyl sharýashylyǵy tehnıkalaryn jasaýdy qoldaý maqsatynda Aýyl sharýashylyǵy mashınasyn jasaýdy damytýdyń ulttyq ortalyǵy qurylady. Qazirgi kúnde bul baǵytta tıisti jumystar júrgizilip jatyr. Sebebi, elimizde agrarlyq sektorda resýrstar jetkilikti jáne bul ónimderdi tutynýshylar sany basym», - dep atap ótti Indýstrııalyq damý komıtetiniń tóraǵasy Іlııas Ospanov beınebaılanys rejımindegi basqosýda.

Aıtýynsha, ótken jyly qazaqstandyq zaýyttar 183 mlrd teńge somasynda 13 myńnan astam aýyl sharýashylyǵy tehnıkasyn shyǵarǵan. Bul taraptaǵy óndiristiń jyldyq ósimi 130 paıyz bolyp, 2,3 esege artqan.

Sonymen qatar, bıyl aýyl sharýashylyǵy tehnıkasyn jeńildetilgen lızıngke berý baǵdarlamasyn iske asyrýǵa 40 mlrd teńge bólindi. Onyń 30 mlrd teńgesi «Jasyl Damý» AQ qarajatynan jáne 10 mlrd teńgesi «QazAgroQarjy» AQ kapıtal naryǵynan tartyldy. Budan bólek, «Ónerkásipti damytý qory» traktorlar men kombaındardy lızıngtik qarjylandyrý úshin 7 mlrd teńge qarajat bólmek.

Aýyl sharýashylyǵy mashınasyn jasaý salasynyń búgingi ahýaly men aldaǵy damý baǵyty tarazylanǵan basqosýǵa Qazaqstan Avtomobıl bıznesi qaýymdastyǵy men «Qazaqstannyń mashına jasaýshylar odaǵy» ZTB ókilderi jáne otandyq birqatar kásiporyn basshylary qatysty. Jıyn barysynda kóterilgen saýaldar men usynystar boıynsha arnaıy taldaý jumystary júrgiziledi.