«Aýyl» partııasynyń jalpyulttyq saýalnamasy: Halyqty qandaı máseleler tolǵandyrady

NUR-SULTAN. QazAqparat – «Aýyl» Halyqtyq demokratııalyq patrıottyq partııasy halyqty tolǵandyryp júrgen máseleler boıynsha «El Amanaty» jalpyulttyq saýalnamasyn bastady, dep habarlaıdy QazAqparat tilshisi.

Saýalnama 23 qyrkúıekte bastaldy jáne oǵan respýblıka azamattary onlaın jáne dástúrli túrde jaýap bere alady. Eki kúnde eki myńnan astam respondent elektrondyq saýalnamaǵa qatysyp, «Aýyl» partııasyna amanattaryn joldaǵan.

Nur-Sultan qalasyndaǵy partııanyń Jastar qanaty «El Amanaty» saýalnamasynyń ótkizý boıynsha alǵashqylardyń biri bolyp iske kiristi.

«Saýalnama bir aı boıy júrgiziledi. Munda halyqtyń kókeıinde júrgen suraqtar qamtylǵan jáne óz usynystaryn jazý múmkindigi berilgen. Elektrondy formatta saýalnamaǵa áleýmettik jeliler arqyly qatysyp, kez kelgen messendjer arqyly siltemesin ashýǵa bolady.Al dástúrli formatta volonterlardy biriktirip, ár aımaqtarǵa, oblys-aýdandarǵa bólý arqyly saýalnama júrgizip kelemiz. Halyq kóterip otyrǵan negizgi suraqtar da bar, máselen elordada úı máselesi, kópbalaly analar jaǵdaıy, oqý bitirgen soń, jumyssyz qalǵan jastar, nesıeniń paıyzyn tómendetý taqyryptary kóterilip otyr. Yńǵaıly, qoljetimdi format, túsinikti mazmun respondentterdiń kóp ýaqytyn almaıdy. Sondyqtan qoǵam máselelerine beı-jaı qaramaıtyn sanaly azamattardy saýalnamaǵa qatysýǵa shaqyramyz.Biz úshin qatysýshylardyń árbir amanaty mańyzdy», - dedi «Aýyl» HDPP eriktisi, stýdent Rýslan Seıithan S.Seıfýllın atyndaǵy QazATÝ-da «El Amanaty» saýalnamasy boıynsha Jastar qanaty uıymdastyrý alqasynyń jıynynda.

Jastar qanaty ókilderiniń aıtýynsha partııanyń halyqtyń kókeıinde júrgen áleýmettik jáne ekonomıkalyq máselelerge basa nazar aýdarýy asa mańyzdy.

Sonymen birge, jas aýyldyqtar saýalnamanyń zamanaýı tsıfrlyq tehnologııalar boıynsha ótkizilýi qatysýshylar aýqymyn meılinshe keńeıtetinin atap ótti.

Saýalnama qorytyndysy boıynsha qordalanǵan máseleler qoǵam eleginen ótip, partııanyń baǵdarlamasyna engiziledi.