«Aýyl» partııasynyń tóraǵasy Májilis saılaýyna baılanysty málimdeme jasady

ASTANA. QazAqparat – Memleket basshysy Qasym-Jomart Toqaev jetinshi saılanǵan Parlament Májilisin taratyp, 19 naýryzǵa Palata depýtattarynyń kezekten tys saılaýyn taǵaıyndady. Osyǵan baılanysty «Aýyl» halyqtyq-demokratııalyq patrıottyq partııasynyń tóraǵasy Álı Bektaev málimdeme jasady, dep habarlaıdy QazAqparat partııa saıtyna silteme jasap.

«Aýyl» halyqtyq-demokratııalyq patrıottyq partııasy óz qataryna tek aýyl sharýashylyǵy qyzmetkerlerin ǵana emes, jalpy aýylǵa janashyr azamattardyń kópshiligin biriktiredi. Bizdiń qatarymyzda agrarly sektor, bilim jáne medıtsına, áleýmettik sala qyzmetkerleri, ǵalymdar men zııaly qaýym ókilderi bar. Qazaqstandyqtardyń jartysyna jýyǵy aýylda turady.

Aýyldy, aýyldy aýmaqtardy damytý, aýyl sharýashylyǵyn órkendetý bizdiń memleketimizdiń azyq-túlik qaýipsizdiginiń negizi bolyp esepteledi. Bul – bizdiń partııanyń bastapqy jáne ózgermeıtin saıası baǵyty. Sondyqtan, «Aýyl» halyqtyq-demokratııalyq patrıottyq partııasy Parlamenttiń tómengi palatasy men máslıhattarǵa saılaý ótkizýdi quptaıdy.

Biz Qazaqstanda partııalyq óristiń keńeıgeni men saıası kúshter arasyndaǵy básekelestiktiń damyp kele jatqandyǵyn kórip otyrmyz. Bul bizdi qorqytpaıdy, kerisinshe yntalandyrady. Sebebi, bizdiń ózimizdiń saıası platformamyz bar. «Aýyl» partııasynyń aýyl jáne aýyldy aýmaqtardy damytý kontseptsııasyna qosatyn óziniń usynystary bar.

Sondyqtan, biz jańa saılaý tsıklinde adal jáne ashyq kúreske daıynbyz», - dedi partııa tóraǵasy.

Aıta ketsek, keshe «AMANAT», «Aq jol» jáne «Qazaqstan halyq partııasy» da úndeý jarııalaǵan bolatyn.

Eske salsaq, 19 qańtarda Memleket basshysy jetinshi saılanǵan QR Parlamentiniń Májilisin taratý jáne QR Parlamenti Májilisi depýtattarynyń kezekten tys saılaýyn taǵaıyndaý týraly Jarlyqqa qol qoıdy.

Májilis depýtattaryn kezekten tys saılaý 19 naýryzǵa belgilendi.

Sondaı-aq, Memleket basshysy barlyq deńgeıdegi máslıhattardyń ókilettigin toqtatý týraly Jarlyqqa qol qoıdy.

Memleket basshysy Qasym-Jomart Toqaev Parlament Májilisi jáne máslıhat depýtattarynyń kezekten tys saılaýyn taǵaıyndaý týraly málimdeme jasady.