«Aýyl» partııasynyń ókilderi Aqmola oblysynyń turǵyndarymen kezdesti
«Búginde partııa basshylyǵy men ókilderi eldimekenderdi aralap, aýyl halqynyń tynys-tirshiligimen tanysýdamyz. Buǵan deıin Túrkistan, SQO, Qaraǵandy jáne Qostanaı oblystarynda boldyq. Búgin Aqmola oblysy, Shortandy aýdany, Damsa aýylyna kelip otyrmyz. Maqsat - aýyl tirshiligimen tanysyp, túıitkildi problemalardy anyqtap, ony quzyrly organdarǵa jetkizý. Jáne sheshý joldaryn qarastyrý», - dedi «Aýyl» partııasy tóraǵasynyń orynbasary Qaırat Aıtýǵanov kezdesý barysynda.
Onyń aıtýynsha, aýyl turǵyndarynyń jıi kóteretin máselesi ol jol jáne sý tapshylyǵy.
«Bizge elimizdiń túkpir-túkpirinen aýyl turǵyndary ózderiniń muń-muqtajdaryn aıtyp, kómek suraıdy. Osy oraıda bizdiń partııanyń «Aýyl - el besigi» atty baǵdarlamasy bar, ony júrgen jerimizde tanystyrýdamyz. Baǵdarlamanyń negizgi baǵyt-baǵdary aýyldaǵy ózekti máselelerdi sheshýdi kózdeıdi. Ol degenimiz turǵyn úı, jol, sý jáne taǵy basqa máseleler. Odan bólek, biz aýyl turǵyndary arasynda saýalnama júrgizip jatyrmyz. Onyń nátıjesinde aýyl turǵyndaryn kóbinese ne mazalaıtynyn anyqtaıtyn bolamyz», - deıdi ol.
Sondaı-aq, partııa ókilderi shara barysynda Damsa aýylynda ornalasqan A. I. Baraev atyndaǵy astyq sharýashylyǵy ǵylymı-óndiristik ortalyǵynyń jumysymen tanysty. Ortalyq mamandary, kelýshilerge bıylǵy eginniń jaı-kúıi týraly aıtyp berdi.