«Aýyl» partııasynyń «El amanaty» jalpyulttyq saýalnamasynyń maqsaty qandaı

NUR-SULTAN. QazAqparat - «Aýyl» halyqtyq-demokratııalyq patrıottyq partııasy tóraǵasynyń birinshi orynbasary Tóleýtaı Rahymbekov «El amanaty» atty jalpyulttyq saýalnamasynyń negizgi maqsatyn atady, dep habarlaıdy QazAqparat tilshisi.

«Aýyl» partııasy el ishindegi eń mańyzdy degen áleýmettik jáne ekonomıkalyq problemalardy aıqyndaý úshin osy is-sharany bastaıdy. Partııanyń bul saýalnamany ótkizýdegi negizgi maqsaty - qoǵamdy tolǵandyratyn túıtkildi máselelerdi el azamattarynan amanat etip alyp, saıası baǵdarlamalaryna engizip, memlekettik bılikke yqpalyn júrgizý arqyly halyqqa tıimdi qyzmet etý. Halqymyzdy alańdatyp otyrǵan búginde kóptegen problema bar. Densaýlyq saqtaý, bilim berý, nesıe qaıtarý, sybaılas jemqorlyqpen kúres, baspana, jer qatynastary, aýyldar men aýyl sharýashylyǵy salasynyń damýy syndy máselelerdi «El amanaty» atty jalpyulttyq saýalnamasyna engizdik», - dedi ol búgin Ortalyq kommýnıkatsııalar qyzmetindegi baspasóz máslıhatynda.

Onyń aıtýynsha, saýalnamaǵa negizgi problemalardyń tizimi engizilgen.

«Qatysýshylar solardyń ishinen eń mańyzdy degenin kózqarasyna qaraı belgilep, bizge jiberedi. Sol máselelerdi ózimizdiń saıası baǵdarlamamyzǵa engizip, olardy sheshý jolynda eńbek etetin bolamyz. Saıası partııa retinde eshqashan halyqpen baılanysymyzdy úzgen emespiz. Biz - elmen birgemiz. Barshańyzǵa málim, «amanat» degen halqymyz úshin, qazaq úshin óte qasıetti uǵym. Osy arqyly partııamyzǵa qandaı jaýapty mindet júkteletindigin de jaqsy túsinip otyrmyz. El múdesin kózdegen «Aýyl» partııasy halyqtyń muń-muqtajyn bilip, olardy sheshýdi óziniń asa ańyzdy mindeti sanaıdy», -dedi Tóleýtaı Rahymbekov.