«Aýyl» partııasynyń belsendileri Taldyqorǵan agrotehnıka kolledjiniń ujymymen kezdesti

TALDYQORǴAN. QazAqparat - «Aýyl» halyqtyq-demokratııalyq partııasy Almaty oblystyq fılıalynyń belsendileri Taldyqorǵan agrotehnıkalyq kolledjiniń ujymymen kezdesti. Oqý ornynyń materıaldyq-tehnıkalyq bazasymen tanysyp, óńirdiń agroónerkásip keshenine maman daıarlaý múmkindikterin baıqap qaıtty.

75 jyldyq tarıhy bar Taldyqorǵan agrotehnıkalyq kolledjinde qazirgi tańda 7 mamandyq boıynsha 1112 stýdent onlaın oqyp jatyr. Negizinen aýylsharýashylyǵyna qajet orta býyn mamandar daıarlanady. Kolledj qyzmetkerleri partııa ókilderine jastardy qalaı oqytyp jatqan tájirbıesimen bólisip, úı janýarlary men qustardyń patologııasyn anyqtaıtyn zamanaýı quraldaryn nazarǵa usyndy.

«Aýyl» partııasy oblystyq fılıalynyń ókilderi el Prezıdenti Qasym-Jomart Toqaevtyń «Jańa jaǵdaıdaǵy Qazaqstan: is-qımyl kezeńi» atty Joldaýyn túsindirip, agroónerkásip keshenin damytýǵa basymdyq berilip otyrǵanyn erekshe atap ótti.

Oblystyq fılıal tóraǵasy Qanat Bekeev óńirde áli de aýylsharýashylyǵyna qajet mamandar tapshylyǵy bar ekenin jetkizip, oblys aýmaǵyndaǵy oqý oryndary, jumyspen qamtý ortalyqtary jáne sharýashylyq sýbektilerimen tyǵyz baılanys ornatý kerektigin tilge tıek etti.

Aldaǵy ýaqytta «Aýyl» partııasy osy máseleni berik qolǵa alyp, kolledj, ınstıtýt, ýnıversıtet túlekterine jumys, al jumys berýshilerge bilikti maman taýyp berýge septigin tıgizbek.

«Almaty oblysynda jas mamandar jetispeıdi. Ol - ózekti problema. Sony sheshýdiń bir joly bar. Oqý oryndarynyń basshylarymen kezdesip, balalardyń oqý máselesin, jazda praktıka ótý máselesin, aýdandardaǵy eńbekpen qamtý bólimderimen birlesip biraz jumys atqarsaq pa degen oıymyz bar», - deıdi «Aýyl» partııasy Almaty oblystyq fılıalynyń tóraǵasy Qanat Bekeev.